我的母親節2012 & K1家長日

5月13日(星期日)

今年係同皓皓一齊度過既第五個母親節！不過講真，之前幾年都唔係好覺呢個節日關自己事，至於今年，呢種關自己事既感覺濃厚咗少少，皆因今年皓皓讀K1，幼稚園既指定動作大家應該都知，就係會教小朋友做啲手作仔送俾媽咪，雖然係例行公事，不過由皓皓親手送俾媽咪，再加一句'母親節快樂'，再加一啖錫錫，依然係甜到入心，haha～～



其實老套啲咁講，有皓皓相伴，已經係一個好開心既母親節～～
我相信天下間所有既母親都係咁，有仔仔女女陪伴自己已經心滿意足。。。。

呢日，當然唔少得同含辛茹苦湊大媽咪既婆婆慶祝啦！
除咗同婆婆飲茶之外，媽咪仲買咗呢個母親節蛋糕送俾婆婆～～

 

飲完茶去咗軒軒表哥屋企既會所玩～～

玩完番婆婆屋企切蛋糕。。。。。

星期五放學既時候，皓皓將响學校整既母親節卡送俾媽咪。
媽咪以為只係得張卡，點知到星期日既朝早，皓皓突然醒起：
呀。。。。。mami，我有嘢送俾你呀～～

諗住皓皓只係隨口up，當秘笈。。。。。。點知佢真係响書包拎咗呢條鍊出黎，
仲話：mami，我同你戴吖～～～～
呢隻豬仔真係冇記性，星期五唔記得咗有條鍊，糊里糊塗，就咁轎响母親節正日至醒起攞出黎送俾媽咪，真係錯有錯著～～
錫晒你，傻豬仔皓皓

母親節當晚特別呈獻：皓皓畫作一幅～～
皓皓第一次畫到一個似人形既人咋！



呢個蛋糕就係送俾嫲嫲既，不過正日見唔到嫲嫲，之後先切蛋糕補番慶祝！




5月19日(星期六)

呢日係學校第二次既家長日，第一次响上學期，學校講明唔駛帶小朋友黎，唯有媽咪湊住皓皓，由爸爸去學校見老師；今次，學校通告寫明話有親子沙龍環節，所以今次爸爸媽咪帶埋皓皓一齊番學校！

雖然媽咪有去，不過就冇入課室，唔知係咪媽咪以老師身分見家長就見得多，硬係唔係好慣以家長身分見老師。。。。。都係爸爸自己一個入算喇！

老師評語，完全冇變：皓皓仲係好文靜，只係會同熟既同學仔玩，其他人(包括老師)好多時都唔係好睬。。。。。老師教既嘢佢全部都明，不過唔會主動答問題，就算老師問，佢都要好肯定自己個答案冇錯先至肯答。。。。。。

老師話皓皓好乖好乖，不過皓皓倔強既一面，老師都領教過（雖然老師冇開口講）～～

有一次放學收拾書包，皓皓以為自己有帶校褸番學，係都要老師俾番件校褸佢～～～～老師話俾佢聽佢嗰日係冇帶校褸番學既，點知皓皓堅持話自己有帶，同老師角力，最後仲喊添！後尾佢喊住上校車，番到屋企樓下，一落車見到爸爸同嫲嫲，就好委屈咁放聲痛哭！直至踏入屋企，佢見到自己件校褸，至此終於真相大白，自己响度尷尬咁笑。。。。。

最近又有一次，皓皓誤會咗媽咪放假會去學校接佢放學，係都唔肯上校車，佢同老師＆校車EE講話媽咪會黎接佢，跟住又係响度狂喊！其實媽咪真係估唔到，平時响學校咁乖，成隻鵪鶉既皓皓，唔知點解响某啲位會咁硬頸咁堅持，難明！

講番呢日家長日，學校安排咗個親子沙龍活動，俾家長可以同囝囝囡囡影輯張親子照，唔錯！

咁啱見到皓皓至LIKE既女同學之一思衡，咁就抓緊機會影番張合照先啦！

拖手仔～～～皓皓好怕醜呀！
補充講多句先，皓皓最鍾意兩個女同學，其一係之前成日同佢好似糖痴豆既綽芝；其二就係思衡喇！
皓皓真係勁LIKE勁LIKE勁LIKE呢兩個女同學仔～～

皓皓望住思衡既眼神，好似好傾慕咁，好攪笑！

仲要笑到好甜。。。。

跟住一齊响學校玩咗一陣。。。。。

思衡既爸爸入咗課室見班主任，爸爸媽咪就幫手睇住思衡～～　



學校即刻print番一大兩細既相俾家長，爸爸媽咪揀咗一張全家幅，一張皓皓既個人獨照，
仲有一張。。。。。皓皓揀咗佢同思衡既合照～～～

家長日完咗，我哋出咗中環飲茶～～

同場加映～～剪髮後清爽look

上次皓皓終於肯踏出第一步，入salon剪頭髮，之後佢話唔再剪喇喎～～～
不過講係咁講啫，係媽咪既威迫加利誘底下，皓皓始終都係屈服。。。。

皓皓啲頭髮真係好濃密，長得又快，今次剪短啲，爽呀！
剪完頭髮，個頭都好似冇咗咁大，wakaka！