Fathers' Day & 5th Anniversary~~

六月份大事：第一係歐洲國家盃開鑼(爸爸媽咪要成日捱眼瞓睇波，絕對係一件大事黎架)；第二係爸爸節(雖然冇慶祝活動，不過爸爸就第一次收到皓皓既禮物，巧感動呀)；第三係心心表姐小學畢業喇(時間過得好快呀)；第四係皓皓開始佢人生第一個既暑期班(講你都唔信，皓皓返咗一年K1，但係返暑期班仍然係喊。喊。喊)；第五，就係爸爸媽咪結婚五周年紀念喇～～

原來真係唔覺唔覺，咁就五年。。。。爸爸成日話，皓皓出世之後，佢响屋企既地位蕩然無存，其實，爸爸你仲有啲地位架，笨唔係蕩然無存架呢，只不過。。。。係比唔上皓皓咁解啫，wakaka～～

歐洲國家盃開鑼

為咗支持吓歐國盃，爸爸同皓皓每人買咗件波衫捧場～～

 

皓皓見到自己件衫同爸爸一模一樣，超級興奮～～

 

不過要補充一句：我哋唔係德國隊蕃薯黎架，只不過係貪佢件波衫幾靚架咋。。。。


爸爸節 (6月17日)

父親節前既禮拜五，媽咪同爸爸去銅鑼灣譽江南食飯提前慶祝，因為正日媽咪要出九龍同公公慶祝嘛～～
諗住買禮物俾爸爸，點知爸爸揀唔啱，反而媽咪就大豐收，sorry囉爸爸～～




呢條就係皓皓响幼稚園整既領呔～～

皓皓話俾隻粉紅色青蛙試吓戴喎～～
啱晒啦。。。。爸爸讀中學既時候個花名就係叫青蛙，哈哈～～

淨係由青蛙戴緊係唔得啦，條呔係皓皓親手整俾爸爸架嘛。。。。

 

當然要由爸爸親自示範，咁先至有誠意既，hehe。。。。

父親節正日，晏晝出九龍同公公飲茶，然後同表哥表姐過咗奧海城間大眾書局買故事書～～


心心表姐畢業禮(6月29日)

6月29號，係心心表姐小學畢業禮。。。。。
爸爸媽咪都專登攞咗假去觀禮～～

好多人都話媽咪同心心表姐好似樣，睇呢幅相又真係幾似。。。。

希望心心表姐黎緊會有好愉快既中學生活～～

寫呢篇blog既時候，中一派位結果已經公佈(7月10號)。。。。
心心表姐派到第一志願呀～～

大家都超開心，爸爸話要同心心表姐慶祝喎。。。。。

所以公佈派位結果嗰日，我哋入屯門三聖邨食海鮮～～
成枱都係心心表姐至鍾意食既嘢，食到好飽呀～～


皓皓返暑期班

話說老師話皓皓返咗咁耐學，仍然係超文靜超怕醜，媽咪希望佢見多啲唔同既小朋友，多啲同唔識既小朋友相處，所以呢個暑假幫皓皓响明愛報咗幾個暑期班～～
其中一個話就話係暑期班，不過响六月份就開始喇。。。。。
點知皓皓一聽到話返暑期班，已經喊晒口唔肯去～～

第一堂，喊完一輪，先至肯俾爸爸媽咪走～～
走既時候，佢仲扁晒咀，點解會咁架？

差唔多落堂嗰陣裝吓佢，好彩又見佢冇嘜嘢咁响度畫緊畫～～

第二堂，都有眼紅紅。。。。

中心啲姑娘氹佢去痴下貼紙，佢先俾我哋走～～

呢日裝吓佢上堂，都算OK，不過唔算好投入～～
媽咪見其他小朋友個個都好開心，皓皓同佢哋又好似玩唔埋咁。。。。

 

落堂都獎勵吓皓皓啦，帶咗佢去反斗城～～

上到最近第五堂，都係咁上下，响屋企都話唔想去，
去到就扭吓計喊吓，到落堂嗰陣裝入間房度，見佢又幾留心聽緊導師講嘢。。。。。
唉，七月中開始有另外幾個暑期班，唔知。。。。皓皓肯唔肯上呢？
皓皓，媽咪其實無諗過要催谷你學識啲嘜嘜物物，只係想你習慣吓面對唔同既環境唔同既人，
唔好咁依賴咁嗲咋～～

Happy 5th Anniversary

爸爸媽咪結婚第五個紀念日喇，除咗第一年，我哋每年都有帶埋皓皓一齊慶祝，今年都唔例外。。。。



最近出既kitty產品，媽咪專登買咗兩隻送俾自己～～
唉，等爸爸送，不如自己買。。。。。

無特別節目，只係夜晚出去食buffet～～
等的士中。。。。。。影番張全家福先～～

@ Grand Hyatt～～　



皓皓話要自己攞嘢食。。。。。
攞嘜？之唔係佢最愛既sushi囉～～

皓皓，叫你影張相啫，駛唔駛擺個咁浮誇既表情呀？

再出第二轉，依然係sushi～～

再加上macaron同埋朱古力～～
皓皓第一次食macaron，估唔到佢又幾鍾意食，食咗5,6粒～～

食飽飽又開始玩ipad～～

 

第一次食 Grand Hyatt，食物唔錯，6歲以下小朋友唔駛錢，最重要係。。。。。
媽咪同一班同事夾份join咗個會籍，兩個食其中一個free，
即係話，呢餐一家三口食，埋單都係六百幾，超值～～

食物種類都算多，水準都唔錯～～

 

好甜品者不妨黎試試，事關連唔多好甜品既媽咪都覺得幾吸引～～
呢日，簡簡單單，開開心心度過我哋既第五年周年紀念。。。。。

六月份，仲有一單令媽咪心痛既事發生，就係爸爸整親皓皓隻手指。。。
事緣爸爸閂厠所門既時候，無睇清楚就大力閂門。。。。。
皓皓隻手指仔原來'ZIP’咗响門隙，聽到皓皓大喊，再睇到佢隻手指仔皮開肉爛，
真係心都赤埋。。。。唔止。。。。簡直好似俾刀割咁。。。
嗰一刻，媽咪好似癲咗，喪喊，同埋勁鬧爸爸，仲。。。。
好大力咁BANG咗爸爸幾吓～～
好彩，响媽咪手都震埋唔知點做既時候，嫲嫲好鎮定咁同皓皓消毒傷口&搽藥水，
又好彩，皓皓隻手只係掀起咗啲皮同流血，冇傷到啲骨，
但係，聽到皓皓喊得咁淒涼，媽咪真係痛徹入心。。。
最後，皓皓喊到攰然後瞓咗。。。。
媽咪呢，就白痴到走去搵度門輕輕咁夾吓自己，都幾痛吓，
就係咁，一諗到皓皓既痛楚，諗起佢個傷口，又忍唔住喊，結果成晚無覺好瞓。。。。
而家皓皓隻手指已經好返晒，
不過媽咪又要再向爸爸SAY SORRY，
整親皓皓，爸爸都好心痛，好內疚，而我。。。。
仲係咁鬧佢(其實嫲嫲都係咁話佢)，又打佢～～
不過，一次教訓已經足夠喇，以後真係要小心啲～～