KidZania以外的選擇～～Bom City(職業體驗）＊上篇＊

7月13日(星期五)

由09年第一次帶皓皓去旅行開始，媽咪開始不斷搜尋一啲啱皓皓玩既地方，後來見到東京台場KidZania既介紹，立即驚為天人～～俾小朋友試做一啲大人既工作，真係好得意；加上啲制服又cute，場景＆道具又迫真，媽咪真係覺得好好玩。奈何。。。。皓皓實在太細，唔係太啱玩；到上年去大阪，KidZania甲子園開咗，加上皓皓已經三歲幾，應該識玩喇卦！之但係。。。。以皓皓既性格，又嗲又依賴又怕醜，要佢自己一個玩呢啲遊戲，根本係冇嘜可能。雖則媽咪真係好想俾皓皓玩，不過爸爸講得啱，嘥入場費都係其次，到時攪到佢又喊又驚仲大鑊，唯有又打消呢個念頭啦！

到今年年頭，見到blog友帶囝囝去咗台灣既Baby Boss玩，影啲相又好吸引，媽咪又挑起條癮，就'溜'爸爸走一轉台灣，平平哋去幾日，分分鐘抵玩過澳門；點知奄尖既爸爸又嫌呢樣又嫌嗰樣，佢一句話唔鍾意，媽咪都無計，於是乎，團火又俾佢禁熄咗。。。。到上個月，媽咪見到有個團購做緊Bom City既優惠，先知原來香港都有得玩職業體驗，咁就啱晒喇～～去旅行就話驚皓皓自己一個玩唔肯啫，响香港玩，預埋表哥表姐，實冇問題喇卦！

講真，成三舊水體驗三份職業，選擇又少，場景又冇人哋整得咁迫真；皓皓加埋表哥表姐要千幾蚊，其實唔係好抵；但係為咗俾皓皓吓玩＆達成媽咪呢個心願，冇辦法啦，哈哈！

一節兩個鐘玩三份職業，媽咪book咗最早既一節（10點半），諗住無咁多人～～

差唔多10點半，終於有職員出黎做briefing～～
佢話要諗定做嘜嘢職業，然後要個小朋友自己去攞籌。。。。

個職員話每份職業得6-8個位，滿咗就無得做，
好彩我哋排得前，個職員一brief完我哋就衝去救護站嗰度排隊，終於四個都攞到籌～～

做救護員＆警察應該係皓皓最想做既職業，因為有車坐吖嘛！

攞完籌，未夠時間開工，周圍參觀吓，順便睇吓仲有啲咩職業～～

夠鐘喇，小朋友拎住個籌等開工。。。。。
皓皓好似有少少緊張。。。。

不過有表哥表姐陪住，皓皓完全無扭擰，真係太好喇～～
入到去，等換衫。。。。。

再brief一輪，點解咁多嘢講架？

終於講完。。。。。一班小救護員要出勤喇～～
睇怕佢哋最開心就係呢part。。。。因為架救護車真係會駛出黎架。。。。。
開車嗰陣，媽咪見到皓皓笑得好開心呀！

到達意外現場～～

施救對象：一個假bb～～
最初，佢哋都好留心聽救護員姐姐講嘢。。。。

後來，姐姐竟然叫佢哋大嗌，睇吓個bb有冇反應。。。。

佢哋開始忍唔住笑到反艇。。。。

皓皓示範急救：首先烏低身，聽吓bb有冇呼吸。。。。
姐姐教佢用耳仔貼近bb個咀。。。。。但係皓皓唔係好識，係要用個咀貼近bb個咀～～

跟住向bb呼兩啖氣。。。。。

再舉起三隻手指～～

按bb心口10吓。。。。。
真係估唔到皓皓相當認真咁去做～～

完成任務後一臉滿足～～



到軒軒表哥示範。。。。

另一個比皓皓細既小朋友，按bb心口嗰陣，佢竟然情不自禁咁用手篤bb隻眼

 

救番醒bb之後，就夾手夾腳抬個bb上救護車送去醫院～～

做完第一份工，每人賺到5蚊city cash～～
見到皓皓好投入好認真咁去做救護員，媽咪真係覺得好攪笑又好滿足～～

做完第一份工，即刻去排隊攞籌做第二份工：警察～～
好多人呀，媽咪央求個職員勉強攞到兩個籌俾皓皓同軒軒。。。。

全程响間房入面進行，家長只可以隔住塊深色玻璃影相，所以影得唔太清楚～～
教緊佢哋敬禮，皓皓都有跟住做架，不過影唔切～～

皓皓射槍～～有型有款呀！

可惜影唔到皓皓戴眼罩耳筒既正面照～～
不過射完之後，媽咪見到佢好興奮咁走埋軒軒表哥嗰度耳語，然後甜笑。。。。
媽咪估計，佢玩得好開心～～

射完槍之後諗住玩完，仲以為唔可以清楚影到佢哋既制服照。。。。。

原來佢哋仲要出黎行咇～～

跟住架警察車又駛出黎巡邏～～

 

呢part最迫真，小朋友亦都最開心！



巡邏完畢，又賺5蚊喇！

另一邊廂，心心＆詩詩表姐冇玩警察，去咗做護士。。。。

心心表姐抱bb個手勢幾好喎，似模似樣～～

 

haha，唔覺唔覺，玩完兩份職業，已經冇咗個半鐘，
佢哋玩，家長做嘜？
家長就忙喇，全程貼住塊玻璃拍片影相，又要好似記者咁追車（救護車＆警察車），
都咪話唔攰！
不過見到皓皓佢哋咁投入咁開心，嘜都值啦！
寫住咁多先，下次繼續～～