Day 3(part 1):別府八地獄
呢日我哋朝早會去別府八地獄，晏晝就去由布院～～
其實媽咪對八地獄既興趣唔係好大，不過八地獄咁出名，我哋一場黎到別府，又冇理由唔去既。。。。。
抱住只志在到此一遊既心態，所以我哋响溫泉旅館慢慢嘆埋早餐，先至施施然出發～～
尋晚落勁大雨，朝早起身個天都仲係好黑，烏雲密佈，不過總算冇咗咁大雨，希望快啲停啦。。。。
呢兩個波波係皓皓尋日响酒店大堂玩遊戲嬴番黎既～～
皓皓尋日亢奮既情緒延續到今日，你睇佢，繼續表情多多～～
佢仲問爸爸媽咪可唔可以响呢度住多一晚，爸爸就話：可以～～不過呢度好貴，如果住多一晚，咁你之後呢幾日都唔可以再買玩具喇。。。。。
有人當堂呆咗幾秒。。。。。然後答：咁我哋走啦。。。。笑死媽咪！
酒店包埋早餐，早餐係自助式既，款式都算多。。。。
check out後，職員好nice，見媽咪幫皓皓影相，就主動過黎話幫我哋影全家福～～
行番過JR站搭巴士，沿路經過別府塔～～
歷史悠久既駅前高等溫泉～～
皓皓响度搞嘜東東？？
咪係試緊JR站前個手湯既水溫囉。。。。。
而家一講溫泉兩個字，皓皓就知係一啲好熱既水，佢會好謹慎咁試水溫。。。。。
响JR站搭25分鐘巴士，就黎到鐵輪溫泉區～～
八地獄其中六個就係集中响鐵輪溫泉附近。。。。。。
先買兩套共通券，包八個地獄入場，每套2000yen～～
如果逐個買，要400yen一個～～
第一站：鬼山地獄～～
鬼山地獄又稱為鱷魚地獄，顧名思義。。。。。裏面有鱷魚睇啦！
利用溫泉熱飼養既鱷魚。。。。
原來鱷魚可以跳到咁高。。。。。好恐怖！
溫泉水高達攝氏99度，到處煙霧迷漫。。。。。
第二站：かまど地獄～～
入口處有個鐘，叫皓皓去搖吓先～～
裏面既免費足湯，皓皓試完水，話好熱。。。。唔浸！
地獄蒸～～利用溫泉熱蒸熟既食物。。。。
啲嘢食引唔起爸爸媽咪既食慾，買隻溫泉蛋試吓就算喇～～
かまど地獄裏有若干個唔同既池，其中幾個都係呢啲泥漿溫泉，無嘜特別～～
最大＆最有特色既一個池～～
啲介紹話，池水係會變色既。。。。。。
離開かまど地獄，繼續向下一個地獄進發～～
第三站：山地獄～～
蓋番個印章紀念先～～
山地獄裏面有動物睇，爸爸買啲餅乾俾皓皓餵大笨象，
不過隻手唔夠長，餵唔到，最後拋過去俾佢食～～
其他既動物仲有紅鶴呀，河馬呀。。。。。好似小型動物園～～
熱氣在群山中升起，所以叫山地獄～～
影相時，一對日本年青男女係咁指住皓皓，又對住佢笑，
見佢哋企定定响度望，好似對皓皓好有興趣咁。。。。。。就叫佢哋幫手影張相啦，haha！
第四站：海地獄～～
係八地獄裏面最大既，亦係爸爸媽咪認為最靚既一個～～
地獄の極樂饅頭～～有人聽到'饅頭'兩個字，以為係响香港有得點煉奶食既饅頭，就扭計話要食。。。。
點知瀨嘢，冇煉奶既？食咗一粒就話：媽mi我飽喇，唔食喇！
旁邊有個池種植熱帶性睡蓮。。。。呢個兜兜，應該係俾人拋啲銀落去許願卦～～
蔚籃色既池水，高達98度～～
第五站：過門而不入既鬼石坊主地獄～～
點解唔入？咪媽咪傻咗囉，以為套共通券唔包呢個地獄，到睇到既時候，又懶得行番轉頭，加上時間又唔係幾夠，咪由佢囉！
事實上，呢個地獄都冇嘜睇頭～～
好似話，由於沸騰的灰泥湧出情況同和尚既禿頭相似，所以叫鬼石坊主地獄（坊主既意思係和尚）～～
嗱！爸爸，睇吓幅相，當自己入咗啦，hehe！
第六站：白池地獄～～
睇落好似好平靜既白池地獄，原來泉溫都有95度～～
其實白池地獄裏面仲有個用溫泉熱養殖既熱帶魚水族館，不過一啲都唔吸引。。。。
呢個時候睇一睇時間，大鑊！原來咁樣行吓行吓，唔覺唔覺已經成十二點，
我哋諗住坐點幾班火車過由布院，但係仲有兩個地獄未睇，最慘既係。。。。。
呢兩個地獄既距離好遠，等巴士，實趕唔切；唔睇，又好似嘥咗張套票；搭遲一班火車，又唔係好想，點算？？
結果，我哋搭咗呢個旅程既第三次的士，1000yen左右，飛車黎到。。。。
第七站：血の池地獄～～
第七站：血の池地獄～～
到此一遊牌～～
聽名就知，呢個地獄係因為溫泉水顏色赤紅，睇上黎好似一片血池而得名～～
賣手信既店鋪～～
聽名就知，呢個地獄係因為溫泉水顏色赤紅，睇上黎好似一片血池而得名～～
最後一站：龍卷地獄～～
龍巻地獄屬於間歇泉，溫度高達150度的熱泉每30、40分鐘就會噴發一次，每次噴出熱泉高達2公尺～～
抱住搏一搏，冇頻撲既心態衝入黎，睇吓會唔會咁好彩唔駛等即刻有得睇，
不過。。。。。彩數既嘢，點會話黎就黎吖？
最後，我哋決定趕點幾班火車，冇等到。。。。
錯過咗最值得睇既一幕～～
呢張係日本官網既相，响現場睇既話，應該都幾壯觀，可惜。。。。。
不過唔緊要啦，我哋抱住滿心歡喜既心情，去下一個目的地－－由布院！
Day 3～～待續
沒有留言:
張貼留言