九州樂滿fun之旅2012~~Day 3(part 2):由布院

8月11日(星期六)

Day 3(part 2):由布院

繼續第三日既旅程喇～～
離開八地獄，我哋照原訂計劃趕搭一點幾嗰班火車去由布院，本來諗住坐的士去鐵輪巴士站，再搭巴士番別府JR駅；不過上咗的士之後，爸爸話轉巴士驚趕唔切班車，不如索性坐埋去JR站啦！媽咪諗吓，都啱既。。。。。我哋已經為咗搭呢班車而放棄睇龍卷地獄既噴池，如果而家連呢班車都趕唔到，咁咪雙失？保險啲，都係唔好轉巴士喇。。。。。

同司機講目的地改為JR站之後，司機就開始不斷撩我哋講嘢。又一次雞同鴨講，好彩佢識幾個英文字，都估到少少佢想講嘜。。。。佢知我哋要搭車過由布院，就話由布院係一個好靚既地方；又話皓皓好似日本bb。。。。。就係咁樣，大家勉強既雞同鴨講對話維持到落車，終於可以鬆一口氣！

到咗別府站，距離上火車時間只有十零分鐘，好彩唔搭巴士，如果唔係一定送車尾。。。。。。

我哋坐既列車：充滿田園氣息既由布院特急列車！

講起由布院既列車，最為人知就係每日只有六班往來別府＆由布院既觀光列車：ゆふいんの森（由布院之森）。
媽咪最初plan行程，諗住點樣遷就點樣調行程都好，無論如何都要坐ゆふいんの森；點知去到九州訂車飛嗰陣先知，由於七月頭九州北部暴雨關係，導致河流氾濫山體滑坡，而ゆふいんの森就因為其中一段路受到影响而停駛，聽到職員咁講，媽咪當堂呆晒，失望至極！

呢日坐既特急ゆふ4号，之前上網睇好似係普通列車黎，點知到站後。。。。。簡直係驚喜呀！
呢架咪就係媽咪好想坐既車囉！



火車用木質裝潢，充滿懷舊古典味，仲有呢個車卡，可以俾人一邊坐低食嘢，一邊欣賞車外美景～～
我哋上車之後，原本係坐响指定既座席，不過有位服務員姐姐就好熱情咁帶我哋黎呢卡車坐，好正～～



當然要影相留念啦～～

小冊子上面既布院列車好可愛～～

 

仲有本留言冊，俾乘客寫吓感受。。。。
媽咪忍唔住要留番幾隻字先，唔知將來有冇機會可以睇番呢？



跟住服務員姐姐攞啲制服過黎俾皓皓著扮車長，好得意！

 

接近由布院，開始感受到陣陣既田園feel～～

＠由布院駅～～
車站月台好有特色，仲有個免費足湯添！不過媽咪唔記得影相。。。。。

一落車冇耐，皓皓就頂唔順瞓咗覺。。。。。
爸爸媽咪沿住湯の坪街道一直行，諗住去到金麟湖，再折返既時候先至叫醒皓皓～～
行咗幾分鐘，就見到好多人都有介紹既鋪頭，
裏面出售既由布高原布丁口碑好好，不過我哋打算回程既時候先至食。。。。



勁出名既B-speak瑞士卷，冇可能唔食既呢～～
蛋糕好鬆軟，唔錯！

呢件豐後牛炸得好香口，好食！

一路食吓嘢一路行，唔覺唔覺，就黎到鼎鼎大名既金麟湖，
不過我哋眼前見到既，同一個普通既湖冇嘜分別，完全感受唔到嗰份靈氣秀美，或者。。。。。
唔啱時間卦。。。。據講，清晨時分既金麟湖湖面會籠罩住一層霧氣，好靚咁話。。。。。
諗住黎到金麟湖就嗌醒皓皓影相，但係見到個湖，連影相既興致都冇埋，
求其影幾張，由得皓皓繼續瞓啦～～

行到九州自動車博物館，係時候要叫醒皓皓喇～～

因為呢度有皓皓鍾意玩既車仔。。。。。

 

皓皓俾我哋搞醒，即刻發晒爛渣。。。。。不過見到有車仔玩，心情好快就平伏番，haha~~

呢兩架車仔係昭和40年代&1966年既產物，歷史好悠久呀～～

鐵人28＋攪笑父子二人組～～

 

1972年出產既法拉利～～





由布院真係一個令人感到好舒服好悠閒既地方，爸爸媽咪都好鍾意呢度～～



wow！好可愛既麵包超人果汁機，皓皓即刻要整番一包～～





全間舖都係賣有貓貓圖案or貓貓造型既產品～～



啲貓貓擺設好精緻，爸爸忍唔到手要幫襯吓～～



响呢條湯の坪街道，你會發掘到好多有趣既鋪頭～～

其中一間勁過癮既鋪～～
據講啲魚仔可以咬走腳上既死皮，有美肌醫療效用，信不信由你。。。。。

唔理真定假，貪得意既話，點都要試試既，係咪？

 

一放對腳落去，啲魚仔就湧埋黎咬，好痕呀，不過又好頂癮～～
有隻豬仔話驚俾魚魚咬，隻腳係都唔肯放落水。。。。。



嘩！隔離個池啲魚勁大條，職員問我哋浸唔浸，唔。。。。。都係咪搞！
事關我哋見到有個女仔一放隻腳落去就尖叫，然後隻腳冇再浸過落去，
睇吓啲魚個口咁大，都咪話唔嚇人～～

嗰邊大熱呀one piece，度度都見佢既蹤影～～

我哋買咗幾個鎖匙扣要刻名，等候期間嘆番杯軟滑雪糕先～～

好寫意呀皓皓。。。。。

好多嘢睇既hello kitty舖～～

免費手湯～～

行到六點左右，個肚打晒鼓。。。。。。
啲舖頭陸續閂門，我哋就開始覓食～～
黎到旅遊書介紹既食店～～割烹！割烹係料理既意思。。。。。



而呢度最出名既就係走地雞料理～～
呢個走地鳥鍋，好好味！

另外仲嗌咗兩set sushi，一set豐後牛。。。。。

好豐富，同埋食得好滿足既一餐～～
絕對係值得推介既食店～～

八點幾，搭火車番博多。。。。。

之前買咗半打由布高原布丁，等車既時候，每人嘆番一個先，又香又滑，正！

番博多要响大分站轉車～～
呢架車係放响大分車站裏面既，以為只係擺設，但原來真係會駛出黎架～～

呢日既由布院旅程，真係俾我哋有意外驚喜～～
一個幽靜既小鎮，一條讓人可悠閒散步既湯の坪街道，一間間充滿特色既店舖，
地方雖小。。。。。卻令人有不枉此行同難以忘懷既感覺～～


Day 3～～完