九州樂滿fun之旅2012~~Day 2(part 3):溫泉樂@花菱ホテル

8月10日(星期五)

Day 2(part 3):溫泉樂@花菱ホテル

上回講到玩完Harmony Land，我哋就番別府去酒店check in～～
呢一晚既住宿，媽咪最初有考慮住由布院啲溫泉旅館，因為由布院嗰邊既旅館普遍黎講都好靚，環境又古樸啲，齋睇相已經感覺好正！不過爸爸希望酒店附近有啲商場呀，或者大型超市呀，可以俾佢夜晚出去逛逛，由布院入夜就冇嘢行架喇，而別府就有個開到夜晚10:00既YOUME，加上住別府好似配合我哋既行程多啲，所以最終我哋放棄咗由布院～～

五月機票confirm就即刻物色酒店，雖然唔考慮由布院，但淨係別府既溫泉酒店都唔少。。。。。大部分旅館既溫泉都係男女分開浸既，但媽咪就唔想！咁淨番落黎既得兩個選擇：一係book有私人風呂既(當然價錢貴好多)；二係book提供貸切風呂/家族風呂既旅館(即係好似租場咁，你都可以成個family一齊浸，不過就限時限刻囉)，最後爸爸媽咪決定，橫豎都係要洗錢喇，就豪一豪。。。。。一晚咁多啦，wakaka！

最終選擇：花菱ホテル！
媽咪托一個識日文既朋友幫手翻吓譯，又上網search吓自己個平假名（因為上酒店個官網book房要填平假名），卒之順利預約成功。呢日黎到酒店，攞張預約紙俾個女職員睇，佢講一大堆日文，見我哋唔明，又重覆嗰一堆日文，真無奈！後黎搵咗個識少少英文既男職員黎同我哋講，其實都唔係好明，直至聽到一句'onsen inside your room'，終於知道原來佢覆述緊我哋預約嗰間房既種類同設施。。。。。。最後講埋夜晚用餐時間，佢就引領我哋上房喇～～

入到房，'嘩'一聲，個感覺好舒服！
見皓皓即刻撲上張床度，就知佢幾冧間房～～



客廳全部落地玻璃，望住無敵大海，好正！

皓皓心情靚爆，表情都特別多～～
佢仲話間房好好玩添，玩嘜？？



之唔係响個地下度碌黎碌去囉！



客廳一隅～～
另外獨立有個梳洗間，同厠所浴室係分開既，好'骨子'～～

間房最貴既地方～～露台。。。
可以睇到成個別府灣。。。。。。

同埋擁有我哋自己既小天地～～私人風呂。。。。
風呂雖然唔係大，不過。。。。。

可以一家人一齊浸，又可以邊浸邊欣賞咁靚既景色，真係好享受～～



細膽豬皓皓最初唔敢浸落個溫泉度～～

經爸爸媽咪鼓勵，終於肯企落去試一試～～

唔試尤至可，試咗。。。。當然玩到唔捨得上水啦！

仲興奮到攞住呢碌好重既嘢响度揮舞，差啲扑濕爸爸呀。。。。。
不過溫泉唔可以浸太耐，加上用餐時間到，
所以我哋嘆咗十零廿分鐘，就換衫去食dinner喇～～

用餐地方～～
唯一唔係太滿意就係個晚餐，因為唔係响自己房食，同埋唔夠傳統。。。。。
媽咪硬係覺得要著浴衣坐地下，食物擺滿矮長枱，大大堆頭咁先至夠feel～～



不過環境都唔差，又係望海。。。。。
係啲座位有少少似酒樓啫，haha～～
呢杯梅酒，令爸爸一試愛上。。。。。

食物都唔錯既～～
精緻既小吃。。。。。

新鮮刺身～～連唔多好白身魚既媽咪都差啲自己食晒一條。。。

仲有壽司呀，天婦羅呀，豐後牛呀。。。。都幾豐富～～
冇嗌兒童餐俾皓皓，叫咗兩碗壽司飯俾佢，清晒！厲害！

食飽飽就周圍紥紥跳～～

食完飯突然行雷閃電落勁大雨，不過我哋照出去行街街～～

呢間YOUME收十點，啱晒鍾意去旅行要分秒用到盡既爸爸媽咪～～
冇嘜牌子衫買，不過個supermarket好大，行吓supermarket都好滿足～～
皓皓就有車坐，勁開心。。。。

仲有個蚊型playground俾佢玩吓～～

番酒店心情仍然high爆，唔願瞓～～

等皓皓瞓咗，繼續邊浸溫泉，邊欣賞別府灣夜景。。。。
媽咪戲言：唔浸多幾次就蝕桌喇～～

宵夜食水果：啲青提啲味好清甜，响香港從來未食過呢隻味，真係唔識點形容，總之就好好食～～

呢晚，唔知係咪環境關係，爸爸媽咪都覺得好relax，
我哋瞓响地下傾吓偈，睇吓相，食吓嘢。。。。攪到好夜先至瞓。。。。。
住呢晚酒店，爸爸狂話好舒服，皓皓就明顯like爆，
媽咪覺得雖然肉赤咗啲，不過都值既～～
因為皓皓再大個仔啲，媽咪想同佢一齊浸溫泉都唔得啦！




其實旅館既室內同埋露天風呂都好唔錯，不過我哋掛住享受我哋既小天地，所以冇享用佢其他設施lu！


Day 2～～完