北海道聖誕飄雪の旅~DAY 4(part 2):化身江戶時代武士@登別伊達時代村

12月25日(星期一)

Day 4：石水亭 check out→登別地獄谷→登別伊達時代村→洞爺湖→洞爺湖萬世閣


又越過高山又越過谷
忍者身體似飛機
天空任意飛
正直善良靈精令人哋歡喜

如果你係同媽咪同年代既，睇怕都識呢幾句歌詞，無錯！就係忍者小靈精主題曲喇，haha！點解媽咪咁好唱口，皆因呢日，我哋hea行完地獄谷，就去下個目的地：登別伊達時代村，又俗稱忍者村～～
一講起忍者，媽咪即諗到細個時候好鍾意睇既'忍者小靈精'，當然啲劇情唔係好記得，但係啲角色就好有印象，包括伊賀派既小靈精，甲賀派既甘麥基，仲有獅子狗俏皮貓。。。。。講吓講吓，真係有啲衝動上網摷番一集半集出嚟睇吓，hehe。。。。。




呢日嚟到忍者村，令媽咪最開心既就係幫皓皓影咗一輯江戶時代武士造型照～～
畀住一張相大家睇先，係咪好型呢？

離開地獄谷，十零分鐘車程，就嚟到伊達時代村～～



超大雪呀！




响正門口有位武士裝扮既人兄，影番張相先～～

入到去，出現眼前既係仿江戶時代既街景、建築、商店街，就好似坐時光機回到往昔一樣～～

時代村裏面到處都係古色古香既建築群，加埋雪景，影相一絕！

除咗景靚，仲有啲畀人玩同參觀既場館，例如｢妖怪屋｣、｢忍者怪怪迷路｣等，
又可以睇吓以前忍者既隨身武器，例如忍者劍呀，飛鏢呀咁。。。。。。

不過據聞呢度因為經營不善，加上票價貴，所以入場人數越嚟越少。。。。。
真係可惜，浪費咗呢度咁靚既景色～～

我哋今次入場既主打係睇忍者霞之屋既表演～～
未夠鐘開show，兩位表演者走出場館外同遊客影相。。。。

後尾又走多一個出嚟，仲擺出忍者常見姿態～～
叫皓皓一齊做動作，佢又怕醜唔肯做喎。。。。。。





排隊等入場既時候，見附近有座'小雪山'，
勁多小朋友走過去當滑梯咁'sir'，皓皓又話要試吓。。。。。




貪玩既哈哈哥哥更加興奮，勢要爬到最頂至'sir'落去。。。。。
結果出現呢個爸媽一齊扶佢上頂既景象，
攪到好似'絕地求生'咁，好鬼好笑～～

終於入場喇！大家排排坐，等睇表演～～

開show喇！先係舞台漆黑一片，然後冷不及防畀突然現身既忍者嚇咗一跳，全場觀眾大叫～～
繼而係表演者响台上機關重重既忍者屋裏面打鬥，
睇佢哋又攀簷走璧，又放飛鏢、暗器，加埋特技效果，都幾賞心悅目！
雖然唔識聽對白，但係都唔覺有冷場，皓皓睇睇吓仲驚到要媽咪攬實，且搞鬼地問媽咪：
佢哋會唔會打打吓打埋我架？wakaka！笑死媽咪喇！
表演完後，表演者仲叫觀眾丟啲紙團上台，原來呢個係江戶時代「用紙包住賞錢丟出去」既打賞方式。
呢一刻，全場觀眾不知拋得幾興奮。

睇完忍者show後，皓皓當咗佢哋係偶像，要坐上台同佢哋影相～～
（大家見唔見到台上面成地都係白色紙呀？）



睇完show，同皓皓去玩變身～～

 

 

媽咪估皓皓想扮忍者，但深沉色既忍者服好似唔係咁起眼，
所以媽咪揀咗呢套華麗啲既武士服～～

變身完畢～～江戶時代武士look！好英呀！

不過唔知係咪有個職員响度，加上著住套束晒腰既衫，
皓皓好似好拘謹咁。。。。。

 

直至到個職員影完相行開咗，皓皓終於識笑～～

見個職員去咗沖張相出嚟，都唔鬼得閒理我哋，
媽咪索性叫皓皓掹埋把劍出嚟玩同影相～～

 

所以後尾皓皓係越影越開心。。。。

 

越影越多表情～～
但係職員影嗰張就有啲呆滯～～～
雖然張相三百幾蚊有啲貴，但係都值吖！

影完造型照，大家去食碗拉麵醫吓肚～～
以主題樂園嚟計，呢啘拉麵既質素好唔錯，價錢亦合理～～
食完嘢再逛多陣，我哋就離開伊達時代村喇。。。。。


上網睇過好多人對伊達時代村既評價都唔係太高，認為唔值得去，不過媽咪就覺得ok～～
可能係見到皓皓睇忍者表演都睇得幾開心啩！加上。。。。。。
媽咪喪鍾意皓皓既武士look囉！（戀仔狂又發作，haha！）



Day 4～～待續