北海道聖誕飄雪の旅~DAY 5:Ski @ 粉雪天堂NISEKO

12月26日(星期二)

Day 5：洞爺湖萬世閣 check out→Niseko Northern Resort Annupuri(check in)→Hirafu滑雪場→dinner @酒店

Day 5，離開洞爺湖去喬契爺指定要去既地方～有雪上王國之稱既滑雪勝地二世古 Niseko 。



整個 Niseko 由三個滑雪場組成，山頂相連，分別係Niseko Village， Niseko Grand Hirafu同埋Niseko Annupuri。

Niseko 出名之處在於佢擁有相當優質豐富既 Powder Snow(粉雪)，而且擁有無敵既靚風景。 Niseko 差唔多每分每秒都落住六角型既片狀雪花，所以整個滑雪場都畀又鬆又軟既雪覆蓋住，堪稱粉雪天堂。




响Niseko山峰，仲可以欣賞有北海道富士山之稱既羊蹄山，超靚～～
（張相摘自其他介紹雪場既網站。。。。我哋邊敢上山頂吖？wakaka！）

呢張就係我哋驅車前往二世古途中影既，當然唔夠人哋响山頂影嗰張靚啦～～

到埗後，先去酒店check in同擺低行李～～
上圖係酒店大堂既佈置：皓皓見到兩隻馬仔，即刻話要坐。。。。。

我哋呢日住既係直通Annupuri雪場既Niseko Northern Resort Annupuri。。。。
呢座係滑雪場既模型，好精緻～～

房間唔大，不過好新好四正。。。。

最重要係有一個令皓皓笑逐顏開既房景。。。。。。

就係兩棵豎立响皚皚雪地上既大松樹～～
皓皓一見到，就尖叫出嚟：媽me，有兩棵聖誕樹呀！好靚呀！
講真，個景堅係靚，直情好似張明信片～～

跟住去酒店入面間商店買陣間滑雪玩雪既工具～～
例如雪鏟呀，砌雪人雪球既倒模呀。。。。
呢副pink色既雪鏡好搶眼，差啲有衝動買埋添～～



雖然酒店直出就係Annupuri雪場，但我哋渣車去山既另一面Hirafu，
因為Hirafu係三個雪場當中最大型同最受歡迎既一個～～

去到Hirafu，先填飽個肚。。。。
食物唔錯，百零蚊一個餐亦唔算太掠水～～

 

 

食完嘢就去租滑雪用品～～
期間媽咪攞啲動物帽畀皓皓試，好得意！但當然冇買啦。。。。

其實我哋一家只有爸爸滑雪，媽咪就陪皓皓玩雪。。。。
响爸爸未開始滑之前影番張合照先～～



皓皓太細唔滑雪，媽咪只幫佢租咗副雪鏡～～



皓皓扮滑雪係咪都好有型有款呢？



媽咪知道Hirafu雪場有個專for小朋友玩既兒童樂園，可以玩吓雪橇呀滑梯呀咁，
於是就同哈哈哥哥＆Fion ee去搵。。。。。
沿路見到棵用雪砌既聖誕樹～～

點知呢個雪場實在太大，原來個樂園距離都好遠，當時雪又大，
拖住兩個小朋友，可以話舉步維艱。。。。。
最後唯有放棄，搵咗個有雪屋既地方停落嚟玩吓雪就算～～

响鋪頭買咗個雪人倒模，而家大派用場。。。。。
整出嚟既雪人雖然細個，但好可愛～～



爸爸滑咗一陣雪都有過嚟陪皓皓玩吓，算佢有番啲人性






曳豬皓皓攞雪球'dump'媽咪～～



越嚟越大雪，皓皓雖然戴咗防水手套，但應該都抵擋唔到雪既寒意，
佢突然同媽咪講：媽咪，快啲同我走呀！我隻手僵咗呀！
唔知佢係咪有啲驚呢？haha～～



其實媽咪都覺得好凍，有啲頂唔順。。。。。
於是同皓皓入咗室內既地方飲杯熱飲，暖暖啲心肝脾肺腎先～～



一面飲嘢，一面欣賞吓人哋啲滑雪英姿～～
不期然諗番爸爸媽咪第一次响韓國滑雪，當時膽大包天既爸爸連煞掣都未識，
就咁俯衝咗落渠邊，而家諗番覺得好好笑，
但嗰陣媽咪親眼望住個情景，真係嚇鬼死！



滑完雪，大家都攰，所以响酒店揀咗間日本料理食dinner～～



等到8點幾，終於有得食～～



酒店食當然貴少少，不過超yummy 。。。。



啲uni真係好甜。。。。好掛住呀！
响香港真係食唔到咁鮮甜既海膽，嗚。。。。。



嘆埋個甜品，超滿足～～



此刻望望窗外，真係大雪到無朋友～～
陣間佢哋幾個男人又去泡露天溫泉，真係好冰火呀！wakaka！



露天溫泉雖然有蓋，但佢哋話啲雪會飄入去，
頭頂結冰，個身就滾，勁爽云云。。。。。



兩個小朋友無得浸，又係番房同媽咪玩親子～～



畀大家睇埋酒店其他設施。。。。。。
cafe有個火爐，好有feel～～



酒店一隅既裝潢。。。。



仲有圖書館，提供電腦上網～～



第二朝包早餐，食物款式算係咁～～



皓皓有得自己攞鮮奶飲，so happy～～


整體嚟講，二世古雖然距離札幌較遠，但係一個值得去既地方。。。。。
唯一唔滿意，就係去唔到個兒童樂園畀皓皓玩，早知去番酒店嗰個雪場算啦～～


Day 5～～完