北海道聖誕飄雪の旅~DAY 4(part ３):人間仙境@洞爺湖

12月25日(星期一)

Day 4：石水亭 check out→登別地獄谷→登別伊達時代村→洞爺湖→洞爺湖萬世閣


今日年初九，响度恭祝各位blog友蛇年行大運，身體健康，想嗰樣就有嗰樣，恭喜恭喜！
農曆新年假啱啱完咗，即係話媽咪陪皓皓吃喝玩樂既日子亦都結束，收拾心情開工之餘，亦係時候開'行'turbo快啲寫晒未完既北海道之旅！唉。。。。今次既進度真係。。。。超慢！

繼續Day 4既行程。。。。參觀完伊達時代村，我哋就驅車前往洞爺湖～～
其實最初冇諗過去洞爺湖，因為睇資料覺得呢度冇嘜嘢玩，不過因為要遷就某啲行程，所以最後決定响洞爺湖住一晚～～



洞爺湖雖然冇嘜玩樂既地方，不過呢度風景如畫，猶如人間仙境。
如果鍾意浸溫泉既話，呢度更加係超正！試諗吓。。。。
响恬靜既環境下，一面欣賞雪景，一面眺望光明如鏡既洞爺湖，一面浸溫泉，真係夠晒relax～～



可惜呢種非凡既享受就只有爸爸＆契爺佢哋領略到。。。。。。
事關泉水溫度好高，皓皓應該浸唔到～～
不過唔緊要，媽咪買咗包溫泉粉，响酒店房自己炮製一個私家風呂，
調校到皓皓接受到既水溫，兩母子一齊浸，一樣咁爽咁正！







離開伊達持代村，由登別渣車落洞爺湖，好快就到。。。。。
我哋先去酒店check in～～

呢日住既酒店係洞爺湖萬世閣～～
本來想住湖畔亭，因為據聞萬世閣會較多旅行團。。。。。

不過媽咪覺得呢間酒店幾正，因為。。。。。
房裏面可以整番個私人檜木風呂～～



加上由房望出去，已經欣賞到一絕既洞爺湖景，超靚～～
洞爺湖係火山湖泊，面積居日本第三位，更係北海道三大景觀之一。
由於湖泊位處溫暖既太平洋側面，所以終年不結冰，係出咗名既'不凍湖'～～
如果天氣好既話，仲可以望到有北海道小富士山之稱既'羊蹄山'，
可惜吖！呢日比較大霧，睇唔到～～

和洋式房間，可以瞓床，又可以瞓榻榻米～～

呢間房仲大過石水亭嗰間，皓皓勁興奮，又玩碌地沙～～
又真係幾好玩既。。。。碌十幾個圈都唔會撞牆，wakaka！

大家休息咗一陣，諗住出去行吓。。。。
响旅遊書搵咗達地方，再响GPS入咗電話，點知搵極都搵唔到。

其實有時旅遊書真係唔update架，畀佢咁樣老點完，我哋足足嘥咗個幾鐘搵路，
最後唯有折返行吓酒店附近既手信店就算喇！

好彩手信店都多嘢買，我哋都有啲斬獲～～

店裏面仲有架有型有款既電單車，超級車迷皓皓即刻要求戴頭盔＆坐上電單車～～

買完手信，早少少番酒店食dinner，呢晚個package係包一餐buffet～～
不過個buffet真係好普通。。。。。最好食既已經放晒响枱面，五隻手指數得晒～～

呢日係聖誕，期間有聖誕老人走過嚟派禮物畀小朋友～～



 蛋糕上面又整咗啲聖誕裝飾嚟氹吓小朋友開心。。。。

食完buffet，爸爸佢哋去浸露天風呂，媽咪同皓皓就留响房浸～～
浸完溫泉，皓皓精神到老虎都可以打死幾隻。。。。。
於是攞把忍者劍出嚟係咁舞～～

加上間房有幾度門，皓皓當正佢係間忍者屋，响間房度喪跑，左穿右插，
又拋紙巾扮放飛鏢，晏晝睇完忍者show真係上晒腦，畀佢笑死。。。。。



浸完溫泉，我哋成班人一齊响房食宵夜飲梅酒吹水，勁happy～～

 

咁靚既景真係唔好嘥，第二朝食完早餐再响房度影吓相。。。。。。
 

又落酒店外既大雪地影，地方空曠又大風大雪，勁凍～～


Day 4，豐富行程欠奉，但就過咗好輕鬆，好悠閒，好稱心既一日！


Day 4～～完