宵夜buffet@JW Marriott +摘草莓@錦田鄉村俱樂部

二月一日(星期五)


今個學年，媽咪調咗去第二間院校，所以呢晚，舊院校既同事話約出嚟聚吓吹吓水。。。之前我哋食過一次萬豪宵夜buffet，覺得比正價抵好多，最重要既係，佢既宵夜都有鮑魚食，就係呢個原因。。。。我哋呢晚又翻啅萬豪～～

同事話好耐冇見皓皓，咁就帶埋佢出嚟啦。。。
媽咪約咗同事8點，放工返屋企湊皓皓會比較趕，
所以就請爸爸幫手帶皓皓出金鐘'交接'，haha！

未夠鐘，所以响太古廣場影吓相先～～



皓皓而家未必肯畀你影相，但有時又會自動波，自己擺晒啲chok甫士出嚟！



影完相都係未夠鐘，不過入去坐住先喇～～

見到枱面有蠟燭，條'吹蛋糕癮'就發作，'呼'一聲吹熄咗。。。。



個waiter咋咋林過嚟點番著枝蠟燭，皓皓又想吹，畀媽咪阻止咗。。。。。
如果人哋又過嚟點第二次蠟燭，好樣衰架嘛！



回本方程式～～狂食鮑魚，wakaka！

食吓傾吓，唔覺唔覺就坐到11點，影埋張大合照就散喇，下次再聚lu～～
呢刻，皓皓都玩到好眼瞓，諗住快快趣趣打的番屋企，點知。。。。。。
好恐怖！呢晚唔知咩事，等極都冇的士，條的士人龍一粒鐘先郁咗兩三個，
媽咪又唔敢夜媽媽帶住皓皓沿住條斜路行落去，重點係。。。落到去都未必有的士。。。
最後要麻煩爸爸响屋企截架的士出嚟酒店兜我哋番屋企，辛苦你喇，爸爸！
另一邊廂，皓皓等咗咁耐，其實都有啲驚，媽咪諗佢應該好驚番唔到屋企。。。。
後尾聽到爸爸嚟接我哋，先至定番啲咋！

二月二日(星期六)


呢日爸爸放假，唔想悶响屋企，但諗嚟諗去又唔知去邊好。。。。。最後決定又去錦田鄉村俱樂部，因為呢度啲玩意啱皓皓，最緊要係佢玩得開心啫！爸爸媽咪去邊其實又有嘜所謂！

我哋要等心心表姐學完琴先至出發，所以先出尖沙咀食lunch。。。。。



又係爸爸媽咪既食堂～～Sushi Hiro～～

食完過奧海城滙合心心表姐同芬姨～～

搞嘜鬼皓皓你好似女孩子咁嬌俏架？

搭西鐵去錦上路再轉的，好快到埗。。。。。。

呢日我哋撞到blog友仔宇正呀，咁難得。。。影番張合照先～～
宇正好大個仔喇！（第一次睇宇正個blog時佢仲係bb仔，時間真係過得超快呀！）

皓皓。。心心表姐。。宇正＆宇正媽咪～～

皓皓好鍾意玩呢隻卡通自動車，不過40蚊坐一個圈，真係好鬼貴～～

驚驚青青餵羊羊～～

呢度個草地好大，啱晒畀細路仔喪跑～～

後面有個細龍門添。。。可惜冇帶波藜踢～～

超短但超快既滑梯，個個小朋友sir完都'櫈'咗落地～～

跟住去摘士多啤梨。。。上次11月學校親子旅行嚟，啲士多啤梨仲未當造～～

皓皓猛咁嗌：媽咪！呢粒好大呀！摘呢粒啦！

唔畀媽咪幫，要自己剪喎。。。。。

但有人超搞笑囉！以為剪親自己隻手流血，跟住好驚。。。。。
（查實。。。。手上啲'血'係士多啤梨汁，kaka！）




啲士多啤梨同超市買嗰啲日本草莓拍埋當然冇得比，但尚算大粒，酸酸甜甜，都唔太差～～

 

摘完strawberry都意猶未盡，BBQ埋至走～～

嘢食唔太OK，不過唔緊要，志在過吓口癮～～



照人頭計，皓皓都唔食嘢，計一位錢實在唔划算，
跟住老闆話唔食唔駛計錢，但如果話咗唔食而又見到佢偷食。。。就計雙倍。。。。。
再跟住就畀咗個貼紙'痴'响皓皓身上，雞乸咁大隻字寫住－－－－唔燒

哦。。。。皓皓偷食。。。。
當然唔係啦，條腸仔係爸爸响小食店買過嚟畀皓皓架！

 

食到咁上下，皓皓話要跳彈床。。。。

又要去鍊番轉車～～

玩完＆燒埋嘢食，差唔多6點我哋就走喇！開心既1day！