關西食玩買之旅2013~~Day 2(part 3)^^ Shopping＠梅田+搵食@難波

5月16日(星期四)

Day 2：酒店→USJ→梅田→難波→酒店


唉！yahoo blog真係越嚟越唔掂，直程激到你嘔血！

原本媽咪已經寫晒day 2旅程，點知辛辛苦苦打完，一post．．．．咦？冇咗最後兩張相？同埋最後一部分既字消失咗既？好啦，再打過啦！打完再post．．．．呢次仲大鑊，冇咗十幾張張相同成堆字．．．．搞咩呀？抱住一線希望，諗住响草稿摷番，又冇喎！嗚．．．．真係想喊！打一篇blog其實要花好多時間架！

媽咪唔敢再試，容嘜易越試，就越食得多字架！
最後無奈地將冇畀yahoo delete既，死裏逃生既blog post咗先(即係part 2嗰篇)，畀佢delete咗既，就响呢篇part 3簡單少少打番出嚟就算。。。。
(後尾知道，原來而家yahoo限制每篇blog字數。。。。。唉！越嚟越麻q煩！你限字數都唔好食晒人哋'突'咗既字數吖。。。。)




算！唔好勞氣。。。。畀張皓皓既金雞獨立相大家睇吓先～～





Part 2講到我哋離開USJ，即刻去搵間壽司店醫肚，食飽飽之後，皓皓就開始倦極入睡喇！

不過呢一刻，先至係爸爸最興奮既時間，點解？

因為我哋將要起程，去Mall場林立既梅田shopping掃貨囉！

講開梅田既新地標新Mall霸，非呢間26/4新開張既Grand Front Osaka莫屬喇；
GFO面積超過50平方米，鋪頭有260幾間，真係行到你腳跛都仲得．．．．．

不過我哋呢日shopping時間有限，所以我哋放棄GFO．．．．．
精挑細選下，鎖定一個Mall重點出擊．佢就係．．．．．
JR大阪三越伊勢丹～～

Isetan係爸爸指定要去既，裏面主打女裝，有六層咁多；男裝就只有兩層～～
雖然佢只有兩層男裝，但就幾乎有齊晒所有流行品牌：
OriginalFake、NEIGHBORHOOD、mastermind JAPAN、Visvim、UNDERCOVER、Garçons．．．．．
嘩！超強勢(殺傷力)！


行到八點零鐘，再去退稅！呢個時候皓皓亦瞓醒喇，真係好配合呀！

呢個Hello Kitty袋，係退稅嗰度送架，幾靚wor～～


行完ISTAN，見隔離LUCUA開到九點，我哋又繼續shopping買嘢！
自從冇去東京之後，好耐冇試過買得咁瘋狂喇！

行到九點，終於拼搏完．．．．
原本，媽咪既行程係chur到盡架，就係shopping完去梅田city空中庭園睇夜景，再响附近食埋串燒大阪燒至返酒店～
不過．．．．．而家唔得啦！我哋真係揪住好多好多嘢，連bb車都畀我哋勾滿晒嘢，搞到變咗形，仲點行？唯有返酒店先～～

返酒店擺低嘢，再去道頓堀搵食～～
(酒店近道頓堀實在太方便喇，行幾分鐘就有大把嘢食～)

呢間零食手信店開到十點，呢晚我哋又冇時間行喇～～
(當時已經挨近十點．．．．．)

太多嘢想食，所以爸爸媽咪決定食兩餐～～
第一餐：四天王拉麵～～



皓皓勁鍾意食既一間拉麵鋪．．．．．

 

諗住食兩餐，所以只係點咗兩碗拉麵兩客餃子．．．．．
點知皓皓唔夠食～～

佢係都要爸爸媽咪嗌多一碗畀佢．．．．．
仲一路食一路講：真係好好味！

第二餐，本應媽咪好想食燒肉～
有朋友食過呢間，話食物唔錯．．．．但係爸爸話熱氣唔想食燒肉！
佢想食串燒喎～～～
(明玩嘢．．．串燒唔熱氣咩？)

不過咁．．．．媽咪都冇嘜所謂既．．．．有得食就可以架喇！
最後入咗呢間～～
明明寫住'串燒'，仲好多款式，但入到去先發現，其實呢啲係炸串，
而唔係我哋心目中嗰隻串燒．．．．

搵勻成個menu，終於見到有我哋心目中真正想食既串燒，
不過款式唔係太多～～

味道OK～～
學吓當地人咁，宵夜飲住梅酒嘆串燒，幾過癮呀！

嘩！今日玩完USJ，跟住shopping，返到酒店，又係11點幾成12點，超攰！
不過皓皓同媽咪講，佢呢日玩得好開心wor。。。。，有佢呢句，幾攰都值！



Day 2～～完