關西食玩買之旅2013~~Day 3(part 3)^^ 打工仔實錄@Kidzania Koshien(上)

5月17日(星期五)

Day 3：酒店→神戶麵包超人館→三宮→甲子園→難波→酒店


Day 3，可以話專為皓皓而設既，上晝去完麵包超人館，下晝。。。。就去kidzania koshien玩～～

 

Kidzania好似一個城市既縮影咁，裏面各行各業都有，小朋友可以响一個模擬真實職業既環境中打工賺錢，然後就可以用自己既血汗錢購物消費或者存入銀行學儲蓄．．．．簡單啲講，Kidzania係畀小朋友透過玩樂體驗一吓唔同既職業，以及真實世界既情況，呢個idea，真係．．．無得頂!

 

其實好耐好耐之前媽咪已經好想畀皓皓去kidzania玩，不過礙於皓皓性格太內向怕醜，為免嘥入場費(事關小朋友要獨自參與，大人冇得陪，爸爸媽咪估計佢會發癲)，所以都係得個’想’字．．．．直至上年，皓皓响表哥表姐既陪伴之下，响香港既Bom City順利玩咗一次呢類職業體驗，有咗一次經驗，相信皓皓既接受能力會高啲，所以媽咪就決定，再去東京或大阪既時候，一定會帶皓皓嚟Kidzania～～

Kidzania入面有幾十種職業，大家估吓皓皓會選擇打咩工呢？(提示：為食豬揀既職業幾乎全部同食物有關～～)

呢日响皓皓打既幾份工之中，媽咪最鍾意就係壽司師傅～～
就咁睇相，係咪覺得好pro呢？wakaka!
好啦!即刻帶大家睇吓皓皓呢日既打工實錄～～


                                                

Kidzania分兩個時段，媽咪預約咗下晝嗰一節(4:00-9:00pm)，因為咁樣比較配合我哋既行程～～

媽咪又聽講Kidzania平日都好多人玩，仲會未到入場時間已經排定隊，務求玩到啲搶手既職業．．．我哋嚟到時已經過咗4點，不過好好彩，呢日唔算好多人咋喎！但最麻煩既係，皓皓食完lunch就瞓咗覺，去到Kidzania都未醒．．．爸爸媽咪唔想浪費時間，於是就搞醒皓皓，點知。。。。佢即刻發晒爛渣～～

就係咁。。。本來皓皓第一份工係做宅急便送貨員，但係佢好似隻樹熊咁纏住媽咪，我哋氹極佢都唔肯玩(唉，其實我哋都應該估到：極度怕醜既性格 ＋ 啱啱瞓醒 ＋ 語言不通 ＋ 要佢自己行入去受訓，似乎冇嘜可能)～～
(嗰一刻。。。。媽咪真係有啲擔心我哋既入場費會泡湯。。。。)

用咗成二十分鐘，皓皓心情逐漸平伏，不過依然唔多願玩，直至。。。佢知道有得整嘢食，終於肯開始打工喇～～



任務一：雪糕店店員

嚴格嚟講呢個唔算係打工，因為整完雪糕無人工不特止，仲掉番轉要奉獻8蚊畀佢．．．
皓皓，你未賺錢就先洗錢，唔係好掂喎！

等開工，有啲緊張。。。。

洗手消毒～～

聽講解(聽唔明，皓皓個樣好呆滯。。。)

終於有得玩～～唧雪糕！

 

將朱古力碎'審'落啲雪糕度，同埋將塊餅乾插落雪糕度～～

完成～～
呢份工好快玩完，唔係好抵，但勝在玩完有得食雪糕。。。。。

食番自己整既雪糕，係咪特別滋味既呢？



任務二：銀行開戶


入場時每個小朋友都會獲贈50大元，整完雪糕，皓皓仲淨番42蚊，即刻攞去存入銀行先～～

一聽到個姐姐講日本，有人即刻望向門外既媽咪求救。。。。。
不過sorry呀皓皓，媽咪幫你唔到，因為整個過程係唔畀大人參與架～～

媽咪冇得幫拖，唯有不斷點頭豎起手指公鼓勵佢。。。。。
咦？？？應該ok啲喇喎。。。。皓皓好似寫緊自己個名。。。。。

同第一張相比較，呢張相既眼神係咪堅定同有信心好多呢？
就好似講：媽咪，我得咗喇！

姐姐同皓皓講解點樣提款。。。。。
實在太認真喇，即使明知小朋友唔識日文，仍然堅持講解咁耐，佩服！



成功開戶既皓皓，一臉滿足～～

辛苦開戶，就係為咗攞呢張提款卡。。。。

然後一嚐自己撳錢既滋味。。。。


真係好玩。。。。如果媽咪細個有得玩呢啲玩意，肯定開心死呀！


任務三：壽司師傅

媽咪覺得全日最好玩就係呢個，制服可愛，場景製作認真，打完工有錢收，仲有4件sushi拎走。。。。。

每節有6個小朋友玩。。。。。
換完制服，排排坐等一陣先啦，因為上一節仲未完～～

洗完手埋位，皓皓個樣好期待！

未開始整已經'lam'晒脷，haha～～

雖然聽唔明，但好認真專注咁睇姐姐示範～～

當然仲要間唔中偷睇吓隔離左右點樣做，然後自己又跟住做～～

難度最高既一部分：整軍艦壽司，將塊紫菜圍住舊飯團。。。。。

捲完紫菜，最後將粟米同埋吞拿魚蓉'筆'落舊飯度～～
皓皓好滋陰，慢慢'筆，'慢慢'筆'，結果。。。。。。

全世界整完，淨番佢一個。
姐姐好有耐性喎，竟然冇催促佢～～

大功告成。。。。。
捧住自己啲製成品影張相先啦～～

出糧時間～～



皓皓既製成品～～

見到皓皓渣住自己第一份'人工'，同埋自己一手一腳做既壽司嗰個樣，
媽咪就知道，決定嚟Kidzania玩絕對係冇選擇錯，因為除咗好玩之外，
媽咪彷彿感受到，皓皓因克服咗一啲困難同埋恐懼，而打從心底流露出嚟既滿足同自信～～

呢張係Kidzania專人幫手影既相，盛惠1000yen～～
家長响玻璃門外，根本影唔到咁樣既個人獨照，
況且1000yen都唔算貴，當然買嚟留念啦～～


呢排工作又開始忙，呢篇blog斷斷續續咁响啲空檔位寫，都寫咗幾日，
睇嚟都係post咗上集先，想知皓皓响Kidzania Koshien仲打咗咩工，就留意下集啦！


Day 3～～待續