關西食玩買之旅2013~~Day 3(part 2)^^ 嘆神戶牛@Mouriyaモーリヤ

 

5月17日(星期三)

Day 3：酒店→麵包超人館→三宮→甲子園→難波→酒店


Day 3(part 2)：爸爸媽咪都愛吃牛，呢日一場嚟到神戶，面對無數人激讚既神戶牛，又點可以唔去試試呢？

 

神戶牛價格貴個個都知，所以爸爸媽咪都採取咗一般人食神戶牛既攻略－－揀lunch time嚟食，平好多嘛！

媽咪上網check資料，鎖定咗兩間獲得唔少好評既餐廳，單睇食物圖片，餐廳格局，媽咪既首選係KOBE PLAISIR 神戸プレジール！點知，媽咪5月8號上網訂枱，竟然都已經fully booking！嘩！真係有啲意外，平日既lunch time竟然都咁難訂位．．．．．不過咁就更加證明佢哋既質素有番咁上下，食唔到真係有啲可惜！退而求其次，就係呢間香港台灣旅客都好鍾意嚟食既－－Mouriyaモーリヤ！

Mouriya响神戶三宮有三間分店，分別係總店、三宮店同埋Royal Mouriya，我哋就book咗响總店嗰間食～～

 

上圖取自Mouriya官網上：呢個較平價既Special Selection Steak Lunch睇落都唔錯吖！
(不過呢度應該係兩set既份量．．．．)

睇見都流口水，所以呢日，爸爸媽咪都抱住幾大期望架！

　　　　　　　　　　　　　　　　　　　　

由神戶搭JR，一個站就嚟到三宮，跟住個地圖行，好快就搵到Mouriya既總店～～

咁啱有一枱食飽飽既客步出門口，佢哋話：裏面差不多全部係香港人！
咁誇？？？

坐低後急不及待睇menu，以上呢個係較平價既lunch set～～
Sirloin Steak同Tenderloin Steak係餐廳官網所講既嚴選牛，唔係真正神戶牛！

我哋成日講神戶牛神戶牛，其實點樣先叫神戶牛呢？唔睇資料，真係唔知～～

所謂神戶牛，係指响兵庫縣繁殖、飼養，有純但馬牛血統，BMS值(脂肪含量)達 6級或以上(最高為12級)既牛。換言之，即使有純但馬牛血統，都要經過嚴格篩選先可以稱得上神戶牛(題外話，而所謂A5和牛就只係按牛既可食用部分既多寡同埋牛既肉質分等級，唔需要計血統既)～～
(細聲的講．．．細聲的講．．．白痴的媽咪還以為逢係响神戶出產既就叫神戶牛．．．．)

而Mouriya lunch set 裏面既嚴選牛，據官網講，都係屬於優質牛肉，佢哋都有但馬牛血統，只不過唔係純正既．．．．牧場將佢哋同純種但馬牛放响相同既牛舍生活，大家食相同既飼料．．．官網稱嚴選牛既口感同味道唔會比真正神戶牛遜色～～

再睇吓menu，如果要點嗰啲講到明係神戶牛既set，價錢貴一半！
爸爸媽咪吱吱噚吱吱噚咗一陣間，決定食平嗰種～Sirloin Steak同Tenderloin Steak各一set！
因為有網友話，食唔出貴價神戶牛同lunch set嚴選牛之間有太大既分別呢～～
(兩件牛嚟到喇，睇落都相當唔錯吖～～)

廚師先畀我哋影吓相(仲主動幫我哋影全家福)，
然後先開始操刀～～

未煮好已經香氣四溢，睇到狂吞口水呀～～

厚身呢隻係Tenderloin Steak～～

左手面薄身既就係Sirloin Steak～
碟上面擺放住煎好的蒜片、鹽、胡椒粒同芥末，
側邊仲有個牌，教你點樣用啲調味料，食用效果最佳～～

其實媽咪嘜都唔用，已經覺得好好食，真係入即溶，超正～～
初初見師傅切咗側邊一啲肉碎出嚟，仲奇怪緊點解會咁浪費架呢？
原來啲肉碎係用嚟兜埋落啲芽菜度炒香～～

實在太好味，連皓皓都chur住狂食，所以我哋要點多1set Tenderloin Steak~~

麻煩你喇，大廚！又要嚟多round！

皓皓一個人都食咗成碗飯同半set牛肉，強勁！
皓皓頗咀刁架，可想而知件牛有幾正！

臨走，先留意到樓梯位原來擺滿晒獎座獎狀～～

食飽飽我哋搭車離開三宮喇．．．．
行到中途，媽咪先醒起，print咗張95折coupon出嚟，竟然唔記得用！
實在太失策喇！



呢餐食咗萬幾yen，仲要專登搭車過去食，不過能品嚐到咁正既美食，都值既～～
不過媽咪事後又有少少後悔，人一世物一世，應該叫set真真正正既神戶牛試吓嘛，點都好，
總叫食過吖．．．．
媽咪應承自己，再有機會嚟神戶，一定會豪一次！



Day 3～～待續