關西食玩買之旅2013~~Day 3(part 4)^^ 打工仔實錄@Kidzania Koshien(下)

 

5月17日(星期五)

Day 3：酒店→神戶麵包超人館→三宮→甲子園→難波→酒店


皓皓响甲子園Kidzania既打工實錄，又繼續喇～～


任務四：考車牌做車神

話說皓皓做完壽司師傅後，好興奮咁想話繼續整嘢食，於是我哋即刻幫佢預約另一份製作食物既工。。。。但因為預約既時間未到，我哋就趁空檔帶皓皓玩番佢最鍾意既老本行～～渣車車！

咪睇皓皓呢張相笑瞇瞇咁，其實响佢開開心心渣車之前，
係經歷咗一次痛苦既筆試～～

痛苦之處。。。。在於要自己入呢間房，又完全唔明姐姐講嘜。。。。
仲有，呢間考筆試既房比較隱蔽，皓皓見唔到爸爸媽咪，以為我哋走咗，
於是乎驚到大喊，然後衝咗出嚟～～
媽咪以為皓皓玩完幾樣嘢已經warm up晒，真係萬料不到佢會有咁激既反應！
安慰佢之餘，亦解釋畀佢聽，如果佢唔敢自己一個入去考筆試，就攞唔到車牌；
攞唔到車牌，就渣唔到車車，結果。。。。。
佢抹住眼淚咁自己走番入房～～

最終，响職員姐姐既幫助下，皓皓既筆試攞100分(左)，考到個車牌(右下)，
然後自己填咗張租車表(右上)。。。。。
皓皓，你又克服咗一個難關喇，叻叻呀！

渣車前，職員姐姐講解點樣操作架車。。。。
皓皓似乎已經明白咗個遊戲規則：响呢度每玩一樣嘢，都要聽一堆佢完全唔明既語言～～

終於可以渣車lu，興奮！

仲會渣架車去油站，畀呢班响油站打工既小朋友入油呀，抹車呀咁。。。。
見到呢兩個小妹妹好認真咁工作，好搞笑！
油站職員有人工，咁皓皓呢？佢係享受服務既顧客，緊係冇人工啦～～
皓皓呢次考牌連租車用咗十幾蚊，真係。。。。
賺埋賺埋都唔夠佢自己洗～～

任務五：做旅遊巴乘客

渣完車，見仲有十零分鐘下一份工至開始，所以皓皓走咗上旅遊巴做乘客。。。。

 
架旅遊巴會圍住Kidzania行一個圈～～

期間導遊(前面兩位妹妹仔)會介紹周圍既設施～～

皓皓又要驚又要玩，結果要求媽咪跟住佢架車行。。。。
OMG！搞到媽咪成個傻婆咁追車～～



任務六：蛋糕師傅


下一份工既時間終於到喇。。。。。呢份工，皓皓第一眼見到已經雙眼發亮！係嘜嘢工咁大魔力？之唔係整年輪蛋糕囉！ Baumkuchen 應該係皓皓最鍾意，最鍾意食既蛋糕，所以整完Sushi之後，爸爸媽咪即刻同佢預約時間～～

蛋糕師傅造型～～

開始。。。。先發蛋漿～～

發完蛋，要戴上勞工手套～～
每個小朋友都好順利，好快就戴完手套，唯獨是皓皓。。。。。
皓皓完全唔識戴手套架，就算爸爸媽咪同佢戴，都要搞好耐，
事關佢啲手指打開咗就算，唔識郁架喇！
所以戴嚟戴去，佢都會有兩隻手指入咗同一個窿，超難搞～～
你哋睇吓姐姐，幫皓皓戴咗好多次都唔成功，忍唔住係咁响度笑！

終於搞掂喇～～

不過皓皓似乎對呢對手套好有興趣～～
連姐姐叫佢埋位都唔知～～

望到眼都唔眨～～
正一傻豬仔。。。。

戴完手套，小朋友就輪流咁去'筆'啲蛋漿淋上個滾軸度。。。。
唔睇過真係唔知，原來年輪蛋糕係咁整既～～
就係淋完一層蛋漿擺入焗爐，凝固之後又淋一層，再擺入去。。。。
如是者，一層一層咁焗，真係好花時間呀！

焗好之後，姐姐切咗一小片畀小朋友試食～～
只見皓皓食到津津有味。。。。

試食完，仲可以攞走一小卷年輪蛋糕，呢份工抵玩呀！

仲有糧出添，hehe～～



任務七：果汁店店員


整完年輪蛋糕，已經八點多啲喇，只可以打多一份工咋。。。。
媽咪原本好想畀皓皓做消防員，但係full咗；跟住皓皓話想做麵包師傅，不過最後一節整麵包竟然得皓皓一個人，爸爸媽咪怕佢聽唔明指示，又冇其他小朋友傍住(冇得偷師)，佢會好驚，咁。。。。唯有放棄呢份工啦。。。。
最後。。。皓皓揀做果汁店店員～～

 

好好彩，有個比較大既姐姐傍住皓皓～～

先認識一吓唔同既疏果～～

開始榨果汁前，職員姐姐叫佢哋雙手交疊放响小腹位置。。。。
皓皓唔明，呢位一齊玩既姐姐好好呀，即刻教皓皓點做。。。

同埋對住皓皓做示範，皓皓卒之明白喇～～
將對手放咗响個肚仔度。。。。

工序開始，首先將啲疏菜搣開為一小塊一小塊～～

將水果切粒～～

倒晒啲材料落部榨汁機度然後加冰～～

禁掣開始攪拌～～

部機一開始攪，未見過攪拌器既皓皓嚇到成個人彈後，
反應之誇張，笑到爸爸媽咪肚痛咁滯～～

傻豬仔睇住疏果同冰攪成液體，超級開心～～

試飲。。。。
咁既表情。。。即係好唔好飲呢？

最後將果汁斟落個杯度～～

又大功告成喇～～～
呢份工皓皓玩得好順利又好開心，真係要好多謝呢個一齊玩既姐姐，
佢非常照顧皓皓，每個工序都好細心咁用身體語言教皓皓，
真係要畀10個like佢～～



任務八：shoppong購物


打完最後一份工，皓皓仲淨番42蚊，媽咪就叫皓皓入商店揀禮物～～

又係只准小朋友入去shopping買嘢，皓皓拎住啲錢好開心咁入咗去～～

不過好快就見到皓皓一臉迷惘～～
最初媽咪以為佢唔識睇價錢，後尾見個職員陪皓皓行番出嚟，原來。。。。
裏面啲貨品最少要50蚊，皓皓唔夠錢買～～
見皓皓個樣有啲失望，但都冇辦法架啦！
想離開既時候，見到頭先同皓皓一齊榨果汁既姐姐都响度買緊嘢，
我哋就託個職員將我哋嗰42蚊送咗畀姐姐，點知職員同姐姐講咗一大堆日本後，
就用英文同我哋翻譯，大意係：
姐姐話唔要我哋嗰42蚊，因為啲錢係皓皓既；而佢好想皓皓可以夠錢買到一份禮物，好想皓皓開心，所以佢想送8蚊畀皓皓！
只見職員未講完，姐姐已經從自己銀包攞咗8蚊出嚟；我哋婉拒，姐姐堅決要畀啲錢我哋。。。。
姐姐年紀小小，但好有教養，又識得為人設想。。。。眼淺既媽咪，嗰刻感動到有少少眼濕濕～～
估唔到嚟Kidzania玩，竟然遇到動人溫馨既一幕～～

玩到九點零，我哋離開甲子園。。。。
嗰刻，爸爸媽咪都身心疲累，又肚餓，但見皓皓玩得咁開心，值既～～
行去車站，路經甲子園球場，咁啱呢晚有捧球賽，好熱鬧咁喎。。。。

爸爸走入啲鋪頭度睇吓啲捧球精品，皓皓就攞佢件寶貝年輪蛋糕出嚟食～～
一面食一面猛嗌好好味～～

番到難波已經十點幾，好鬼肚餓呀，所以我哋呢晚又食兩餐～～
第一餐：金龍拉麵！

第二餐：食皓皓至愛既sushi～～
瘋狂地勁擦一輪，超滿足！

番到酒店已經成十二點，入到房，見到呢佪有趣既景象～～
酒店服務員幫我哋執房，仲幫我哋既6隻公仔擺咗個咁既陣。。。笑咗！


Day 3，相當充實既一日！再玩多半日，我哋就要番HK喇，勁唔捨得呀！



Day 3～～完