關西食玩買之旅2013~~後記

成日嗌住好掛住東京，又成日嗌住唔再去大阪住既爸爸媽咪，今次為咗同皓皓玩USJ既Universal Wonderland同埋甲子園既Kidsania，卒之都係選擇再嚟大阪，haha！

不過咁。。。呢次旅行都專登揀啲冇去過既地方玩，例如神戶，和歌山咁，所以仍然係覺得新鮮感十足。至於皓皓。。。。基本上媽咪盡量每日都安排一啲啱皓皓玩既行程，所以佢當然開心到爆啦！4日旅程結束，豬仔皓皓仲識得玩埋排次序添，佢話最開心就係去環球片場嗰日；其次就係去麵包超人館同埋Kidsania嗰日，最唔開心就係第4日喎～～媽咪問佢點解？佢話：第4日淨係睇花花，同埋淨係爸爸媽咪去買衫衫，我都冇嘢玩。。。。Haha！越嚟越多要求喇佢。。。。


另外，呢次好難得可以淡季出遊，個package真係堅平，尤其是同上次聖誕北海道之旅對比，價錢相差成4倍；再加上日圓狂跌至七幾，係我哋同皓皓去咁多次日本之中滙率最低既一次，如果同上次差不多兌十既時候比，買嘢幾乎等於打咗七五折，感覺上真係抵到爛。。。。。亦因為咁，今次買嘢都鬆手好多架呢！

睇吓皓皓既戰利品，就知點解佢咁鍾意去旅行～～

反而買畀皓皓既衫褲鞋襪唔算多～～

爸爸媽咪都買到好多心頭好～～

今次買既零食手信比較少。。。。因為唔夠時間掃貨～～
呢度大部份都係去到機場先至買既～～



日本啲藥成效唔錯，所以又掃一堆。。。。。

呢set神戶限定既公仔好cute，皓皓冇話要買，但媽咪都忍唔住要帶佢哋番屋企～～

响麵包超人館整既襟章～～

每次去旅行都要洗吓錢買相～～
呢張相皓皓好深情咁住kitty，好搞笑～～

朋友託媽咪買既衫同埋遮，無聊既媽咪搵皓皓做小model試著試用，haha～～
而家啲yen咁平，計番條數，比响香港買真係平一大截～～



4日旅程極速完結，但媽咪既遊記就龜速咁完成，拖咗成個幾月，
真係要多謝大家咁有耐性收看。。

又話說皓皓番到HK，猛咁同嫲嫲講旅行好好玩，仲同嫲嫲講佢六月會再去日本。。。。
唔好講笑啦，阿仔。。。。雖然媽咪都好想。。。。

不過又話時話，有日去開銀行中心啲旅行社八吓啲機票價錢，
差啲一時衝動之下畀錢買咗七月既東京package，
好彩最後懸崖勒馬咋～～
因為。。。。實在太急喇，再去番東京既話，媽咪真係想好好咁plan吓，
但媽咪七月其實工作仲係超忙。。。
唔緊要啦。。。。阿仔，唔去旅行啫，最多媽咪放假諗多啲地方陪你去玩囉，好冇？