十二月十二日&十三日
(星期六&星期日)
近排公司真係好多、好多、好多嘢做，以前媽咪通常5點正就走人，而家．．．．真係走唔到，好多時都要攪到6點幾先至鬆人。唉～～～～～～不過踏入呢個禮拜，媽咪心裏面充滿盼望，因為仲有8個工作天，媽咪11日既聖誕假就到喇。好！開始倒數！而仲有14日，我哋既大阪之旅亦會展開，媽咪可以完完全全撇開工作上既嘢唔諗，真係好興奮呀！
就係因為平時工作枯燥又辛苦，所以每到星期六、日既放假日子，就好似沙漠中既甘露一樣，尤其是可以成日都同皓皓bb一齊，呢啲日子簡直令媽咪趨之若鶩
我哋既聖誕特輯又再繼續喇～～
呢日(星期六)係黎到Pacific Place～～
我哋上年聖誕都有黎呢度呀！
不過上年我仲未識行，仲係任由爸爸媽咪擺佈－－
佢哋想擺我响邊度影都得～～
今年？唔好意思喇！要睇吓本少爺既心情～
心情好既就俾你哋影啦
嘩！棵聖誕樹好高呀！
影完相，我哋就買咗壽司番屋企食．．．．
你哋睇吓我～～左一舊，右一舊，食得幾滋味！
係咁望！請你哋食一啖喇！
講笑咋！
你哋唔係當真呀嘛？
餵食豬果然係對食物名敏感啲，
皓皓而家識講好多嘢食既名。
計有：奶奶、魚魚、菜菜、果果、提子．．．．
呢日竟然突然之間講：壽司
星期日，媽咪同我先黎奧海城會合表姐佢哋．．．
搶詩詩表姐個八達通套．．．．
搶完之後好得戚～～
(阿b啲眼睫毛真係．．．
又鬈又長，成日俾人話好似電咗咁！)
黎到Elements喇！架車車好靚架！
成架車都鑲咗水晶，好閃呀！
今年成個場都用水晶做主題．．．．
個佈置都幾靚架！
等我摸吓掛响樹上面既水晶球先．．．．
商場入面既玩具店門口～～
地方闊落，最適合喪跑，哈哈！
黎到商場另一邊～～好似仲靚喎！
你哋睇吓後面既旋轉木馬．．．．
呀！唔係木馬！應該係水晶馬．．．．
心心表姐好似傻瓜咁自言自語：
'如果可以坐上去就好喇！'
心心表姐，你唔好咁貪玩好唔好？
除咗水晶裝飾，仲有好多五頻六色既聖誕樹！
媽咪話呢度靚過Pacific Place好多喎！
影完聖誕相，我哋就黎咗公園玩～～
呢個公園比以前多咗好多嘢玩．．．．
本來好鍾意扭呔盤既阿b，今日唔願玩，係要落車．．．
因為有啲佢更加鍾意玩既，包括呢個好刺激既玩意～
企响度搖黎搖去～～
仲有個都幾刺激既搖搖板～～
阿b玩到唔肯落板！
(媽咪要扶住阿b所以影唔到相)
阿b真係高深莫測～
一時膽大包天，一時膽小老鼠！
最後等我阿b响度提早同大家講聲：
聖誕快樂！
仲有～～～
今日14號係好錫我、
個個禮拜同我去吹bubble既芬姨生日，
我都要响呢度同芬姨講聲：
生日快樂、心想事成！
(其實我已經親口同芬姨講咗聲'快樂'架喇，
雖然冇咗生日兩個字，但係芬姨趣趣哋都收咗貨)
沒有留言:
張貼留言