九月十三日（星期日）
九月開始，媽咪既工作就忙到飛起，自然寫blog既時間亦少咗。。。結果星期日既嘢，dum到而家先至寫。。
呢日朝早未出街，阿b响屋企食個不停。。。。
媽咪食蛋糕，阿b明明唔鍾意食。。。。
但係都要搶。。。。
其實佢只不過扮吓嘢，lam吓lam吓，唔係真食。
又或者玩吓啲cream。。。。
（軟淋淋，佢緊係覺得好過癮）
最重要既，係搶黎扮吹蛋糕！
到爸爸晏少少買麥當當番黎食，佢又搶！同埋阿b食既嘢真係先後有序架！點解咁講？因為。。。。佢會先搶一啲爸爸媽咪唔係咁想俾佢食既嘢～～之唔係薯條囉！冇晒薯條，佢先至慢慢嘆個包～～皆因佢知包呢樣嘢唔駛搶都有得食。。。。而家啲細路仔真係古惑！
睇佢幾嘆！隻腳仔仲要'浪'上張几仔度！
逐啲逐啲搣黎食。。。。
媽咪作狀想食佢個包，就大啖大啖咁咬。。。。
（阿b真係越黎越孤寒，以前佢嘜都會分俾媽咪食
）
又搶汽水飲！
沖完涼瞓一覺，我哋就出發去九龍喇！今次既目的地係尖東，原因係嗰度既duty free裏面間孖C店call芬姨話有新貨，媽咪都想睇呀！就一齊去啦！
阿b已經夠高'禁'lift掣喇！
Duty free門口有個小型噴池，阿b好有興趣。。。。
媽咪好無聊，特登影埋後面班自由行。
話時話，呢間Duty free真係好多好多自由行，唔係想歧視佢哋，但係佢哋真係好冇禮貌囉！响孖C店睇嘢嗰陣，佢哋係要迫埋黎睇，其實好多sale屎都好得閒，佢哋唔識叫人攞俾佢睇架咩？係要有咁埋烘咁埋黎睇！
估唔到商場入面都有轉轉玩。。。。
阿b玩到唔願走。。。。
買完心頭好，滿足晒！係時候要顧吓啲細既感受。。。於是帶咗阿b、心心詩詩去中間道個公園。呢度環境唔錯呀！沿途仲可以欣賞吓海景添！
超級無敵大海景，正！
阿b响呢個窿度玩，自得其樂。媽咪叫極佢都唔肯走出黎！
芬姨又要同阿b著情侶裝！
呢個公園算係幾多嘢玩喎！
阿b，你攪嘜鬼學人丁字腳呀？
玩搖搖板。。。。。
對手係詩詩表姐！
好happy既一日～～媽咪又買到嘢，阿b又可以同心心詩詩响公園玩到顛！見到阿b你咁開心，媽咪真係唔可以咁懶喇，放假要同你去多啲公園玩至得！放心！媽咪應承你！
沒有留言:
張貼留言