九月十二日(星期六)
呢個月既16號係心心表姐既牛一，每一年爸爸媽咪都會同心心表姐慶祝生日，不過星期三大家都要番工番學，咁就提前响今日慶祝啦。。。。
因為呢個原因，媽咪同我今日好唔得閒，我哋朝頭早就留响屋企玩，晏晝就去買禮物＆蛋糕，然後等心心表姐學完琴入黎我哋屋企。
咁。。。。成個朝頭早留响屋企又唔想悶有嘜好攪？等我皓皓bb介紹啲好嘢俾大家啦！
就係同媽咪一齊畫吓畫喇！
因為近排嫲嫲同媽咪講．．．．
話我好鍾意拎住枝筆周圍畫、周圍畫．．．．
於是媽咪就買咗呢張可以用水畫畫既布俾我喇！
啲圖案畫完之後一陣就會乾透消失，咁就可以不斷畫、不斷畫，唔駛擦。
而最好玩既就係呢個包包超人．．．．
你哋睇吓．．．．
佢會跟住啲水印線條行路架！佢而家跟住個波波線條响度兜緊圈！
各位，我呢個介紹唔錯呱？
話時話，媽咪之所以買呢副嘢俾我，除咗因為佢好玩之外，仲因為．．．．
大家睇吓我身後既彈彈波．．．．
zoom近啲睇，彈彈波已經俾我用鉛子筆畫到花晒！
媽咪話，唔想再有其他物件慘遭我既毒手囉！
好！介紹完呢個静態既玩意俾大家之後，再介紹一個動態既．．．．
就係洗白白既時候玩slam dunk喇！
真係幾好玩架！
我仲玩到唔捨得出沖涼房添！
結果要攞埋啲波波先肯俾媽咪抱出黎！
玩到攰喇！係時候要瞓一陣覺覺豬！
快啲瞓，瞓醒仲要去街街．．．．
嘩！呢一覺，阿b瞓到成１點，媽咪連早餐都未食，就快餓暈喇！所以出到街就第一間醫肚先！
有嘢飲，阿b點會錯過？
仲要即刻推開媽咪，慌死媽咪會搶番走佢杯嘢
食完嘢就去反斗城買禮物俾心心表姐．．．．
阿b不斷講：wowo，wowo．．．．
媽咪，好多轉轉呀！
保守估計，阿b起碼拎過10件玩具走黎走去，
媽咪要不斷將佢哋放番原位，真係攰屎！
雖然屋企都有，不過每次見到，阿b總要玩一陣。
唔通响呢度彈好feel啲？
結果媽咪响反斗城只係買到一份禮物（係咩？下回分曉），仲要幫爸爸買一份呀！
最後我哋代爸爸响TRENDY LAND 買咗隻心心表姐恨咗好耐既米妮。
米妮，趁心心表姐未黎到，同我玩陣先啦！
下集預告：心心表姐生日篇
沒有留言:
張貼留言