上篇blog講前嗰排皓皓發燒，攪到媽咪放假都冇得同皓皓去街街，嘥咗兩日假期。。。。話說２４號朝早，媽咪已經覺得皓皓額仔有少少熱；爸爸摸一摸之後話媽咪亂咁up，但係媽咪對皓皓平時既體溫係何其咁熟悉，再摸多幾次都硬係覺得同平時體溫唔同，於是攞探熱器度～～果然，三十八點幾度！
食完藥水，俾皓皓留响屋企休息，雖然冇得出街，不過好彩，心心表姐黎咗我哋屋企，陪皓皓玩咗好耐。。。。
呢排屋企經常開雀局，所以張枱索性就咁放响廳，唔收住．．．
皓皓每朝既指定動作就係走埋張枱度玩麻雀，
連食早餐都要坐响張枱度食．．．
日有所思，夜有所夢，有晚皓皓發開口夢：
唔好收麻雀住，bb要玩．．．
俾佢笑死！
講番２５號星期日，皓皓啲燒仲唔退，晏晝再度溫度，竟然有３９度，媽咪有啲發茅，於是就即刻call番緊工既爸爸，叫佢check吓星期日有邊間診所開，然後飛的同皓皓去睇。。。。皓皓認得唔係平時睇開嗰個醫生，於是喪喊喪掙扎，但係都要俾醫生睇吓啲氣管有冇事架嘛，唯有監粗捉實皓皓～～真係心痛！聽完氣管，媽咪諗住個醫生會好似我哋平時睇開個兒科咁，睇埋耳呀，鼻呀，喉嚨呀咁，點知。。。。
醫：(聽完聽筒)無咩事既。。。。
媽：咁點解會發燒？
醫：。。。。(好似唔識答咁，抑或係唔想答)
媽咪：你唔駛睇吓佢喉嚨有冇發炎呀？
醫：睇吓。。。。(然後先至有動作去攞雪條棍)
此時皓皓已經喊到收唔到掣，見到條棍仲驚，於是猛咁揮手踢腳。。。
與此同時，呢位醫師就教媽咪點樣捉實皓皓～～
醫：嗱．．．．你用大髀夾實佢對腳仔(媽咪照做，不過皓皓太大力，夾唔實，雙腳仍然亂踢)，唔係咁樣！你放佢對腳响呢邊，然後夾住。。。。你捉住佢對手啦。。。。
媽咪一直諗住醫生教我點做點做，係想俾佢可以仔細啲檢查皓皓既喉嚨，點知佢接住講：
如果唔係就踢到我喇。。。。。。
吓！你冇嘢呀，醫生？媽咪想發火鬧佢，不過忍住。
皓皓唔肯擘大口，氹咗佢一陣，個醫生終於唔耐煩搵枝雪條棍撬開咗皓皓個口，只係撬開咗少少，然後唔洗一秒時間，佢就丟咗枝雪條棍。。。。有冇攪錯，咁樣叫做檢查？仲要驚整親自己而叫媽咪監硬捉住阿b啲手手腳腳，真係唔知佢點做醫生架！
最後佢話阿b作感冒，會開啲嘜嘢藥、嘜嘢藥俾我哋。於是媽咪又問：我俾bb食緊第二個醫生啲藥，要隔幾耐先可以食你既藥？
佢答：哦！原來你已經睇過醫生架嗱？
媽咪答：唔係！我只係俾一個月前醫生開落既退燒藥俾佢食。。。
醫(驚嚇地)：吓？佢燒咗一個月架嗱？
嘩！你條白痴，有冇common sense架你？咁低能既說話都問得出！燒咗一個月仲坐响呢度睇你？
媽咪都冇佢咁好氣，係咁咦答完就諗住抱阿b走喇（而佢始終冇答我隔幾耐可以俾阿b食藥），點知條白痴又問我同阿b量過體溫未？（嘜呢條問題唔係應該一開始就問既咩？睇完症先黎問？）
我話度過，成３９度。
佢好似唔信咁，攞枝槍（向住額頭度溫度嗰隻）走去皓皓度（當時爸爸已經抱皓皓行去別處同埋已經氹掂咗佢，唔喊兼夾冷靜落黎），仲懶醒咁同媽咪講話唔好俾皓皓知佢想量體溫，媽咪都阻止唔切，佢突然攞枝槍對住皓皓個額，嚇到皓皓又即時狂喊。。。。
條友真係痴線兼冇腦架！跟住媽咪同佢講：
你嚇親佢呀！唔駛度啦，我都話响屋企度咗囉！
如果唔係想攞佢啲藥俾皓皓試吓有冇效，真係想剷到佢上天花板，兼夾唔俾錢就走．．．．．
好彩，皓皓食咗兩次藥，第二朝就冇事喇！呢次都可謂睇醫生奇遇，亦發覺平時睇開既兒科醫生原來係好好人、好細心、好有耐性．．．．真係貴得有道理！
沒有留言:
張貼留言