爸爸生日篇(補記)

連續趕起七日既京阪旅遊日誌，係時候要補記番呢兩個禮拜既生活片段喇！

第一件要記既當然係爸爸既生日啦！

一月八日(星期五)

呢日係爸爸正日生日，本來已經計劃好爸爸媽咪放工之後，會合嫲嫲同皓皓b一齊食飯慶祝。點知媽咪臨放工既時候，聽到嫲嫲話阿b有啲唔舒服，食咗藥雖然好番啲，但係唔想俾佢出街吹風。。。。爸爸媽咪當然好失望，不過為阿b好，都冇辦法！

爸爸媽咪原本諗住同嫲嫲阿b去食鮑翅餐，而家得番兩條友，就轉移陣地去咗譚魚頭打邊爐，平時我哋會食牛魔王海鮮餐，再散叫一啲，呢日就再嗌多個象拔蚌刺身，正！食完後就嗱嗱林番屋企同阿b一齊切蛋糕慶祝。。。。

媽咪响東海堂買既北海道牛乳芝士蛋糕。

諗住爸爸咁鍾意飲日本牛奶，會鍾意食啩？

爸爸，我知你好鍾意同我皓皓b一齊慶祝生日，

但係都唔駛冧到瞇晒眼呀？

爸爸旅行已經買咗好多嘢，無嘢需要，

但係媽咪唔想一啲禮物都唔送，

於是乎就買咗呢份。。。。

生日蛋糕水晶擺設，好精緻架！

其實媽咪諗住打個如意算盤～～

爸爸有禮物收，收完之後個水晶就係屬媽咪架喇！

點知俾爸爸識穿咗，佢一見到個包裝，就話：

唓！你即係送俾自己。。。

不過媽咪相信爸爸係絶對唔會介意既。。。。

亦無得介意～～因為佢都冇送生日禮物俾媽咪！

爸爸，你許完願我就切蛋糕喇！

阿b試食蛋糕。。。。

估唔到平時唔鍾意食蛋糕既阿b，又幾鍾意食呢隻蛋糕喎！

好開心！媽咪個飾物櫃又多一件水晶喇！

爸爸話：只要一家人一齊，

就算求求其其咁慶祝都無相干喎！

祝爸爸身體健康、心想事成！