西貢遊＋軒軒表哥到訪

近排成日抵受唔到上facebook玩鬥地主既誘惑，每次上咗網諗住打blog，隻手總不由自主地click咗去facebook，所以又要追番上個禮拜既嘢

五月二十一日（星期五）

今日原本想同心心表姐佢哋去西貢獅子會自然教育中心睇吓有咩嘢玩，點知皓皓瞓完個晏晝覺已經３點幾，所以大夥兒都認為去西貢逛吓食吓嘢算數。。。。

朝早落去食早餐例牌要响啲車仔度磨10幾分鐘至走～～

瞓完覺下晝四點幾至入到西貢。。。

先响遊樂場玩一陣。。。。

渣住樽可樂糖當寶，話幫佢渣住先都唔肯。

'SIR'滑梯都好似擺甫士咁。。。。

以前都成日黎西貢食海鮮，都唔覺好似今日咁咁多人～～

可能今日係三日連假既第一日啩！

玩完就沿住海邊行吓，除咗睇到有人練扒龍舟外～～

仲有好多好多人响艇上賣海鮮，

皓皓睇到痴實條欄杆，拉都唔走。。。

呢位著黃色衫咩HOLLO KITTY背囊既仁兄係邊位？

之唔係皓皓既魔鬼教練兼褓母７豬丈囉！

呢次西貢遊既特備節目就係'７豬丈話當年'，

佢全程講番佢讀書時代响西貢發生既'笨蕉'事，

簡直完全配合佢既'笨蕉'性格呀！

食完車仔麵，再周圍散吓步，就已經６點幾喇，又係時候要走lu！

此行其中一個目的就係食車仔麵，講到呢間嘢好好食咁，

媽咪就覺得一般，都係鍾意食榮記多啲！

臨走個天黑晒落雨，小巴站又排長龍，最後要坐巴士走！

hea到不得了既一日！

五月二十二日（星期六）

軒軒表哥成日都話要黎我哋屋企玩，所以今日標標舅父＆ling ling舅母就帶咗佢黎，順便攞番個旅行喼俾爸爸。。。

呢日皓皓全程戒嚴，軒軒表哥玩親嘜，佢就搶嘜，唔肯俾佢玩。

媽咪成日要响中間調停，真係俾皓皓激屎。。。

之後我哋出咗香港仔食謝記魚蛋粉，然後落公園玩咗陣～～

响公園玩應該係佢哋全日最融洽既時候。。。

皓皓望住個bubble吹出黎，超緊張！

忍唔住要出手拍～～

吹完bubble上番屋企玩一陣，就一齊去鴨脷洲嗰邊食飯，

食完晚飯就送軒軒表哥佢哋去香港仔搭車番屋企喇！

軒軒表哥到訪後記

呢個禮拜有兩件事好唔開心，其中一件就係由軒軒表哥到訪而引發～～

話說軒軒表哥响我哋屋企玩玩具，皓皓唔多like，軒軒表哥玩嘜，佢就搶嘜，咁樣唔得架嘛，媽咪好自然緊係會話吓佢，叫佢同軒軒表哥分享玩具。點知就係因為咁，皓皓嬲咗媽咪四、五日，真係好傷心呀！

平時番工，皓皓千萬個唔捨得，但係呢個禮拜，朝朝起身就叫：mami走，唔要媽咪！到媽咪出門嗰陣，佢仲話：媽咪番工，閂門！放工同瞓覺又係咁，猛叫媽咪走同講唔要媽咪，真係hurt爆，媽咪星期四晚終於忍唔住喊咗添！

可能皓皓响軒軒表哥到訪嗰日，覺得媽咪樣樣都偏幫表哥仔，所以極度唔開心囉！就連嫲嫲都察覺到佢呢個禮拜無論食嘢、玩玩具既時候，都會彈一句：唔俾軒軒表哥食/玩！唉！皓皓你唔肯同人share，媽咪又點可以唔話你？估唔到你咁就嬲咗媽咪咁耐！

尋日星期五，皓皓終於同媽咪重修舊好，呢兩日佢又係咁講I love mamimi喇！仲有，佢呢兩日講咗好多次sorry，mami！好似知道佢之前幾日攪到媽咪好唔開心咁。真係講都唔信，兩歲既人仔竟然會有咁既行徑。。。。