東京吃喝玩樂之旅～Day 1＾＾攰爆shopping day

上年七月，皓皓一歲三個月，第一次去東京；上年十二月尾，皓皓一歲九個月，第一次去京都＆大阪；今年七月，皓皓兩歲三個月，再選擇去東京，其一係上次只係去咗好少地方，其二係爸爸媽咪想趁七月大減價瘋狂購物，hehehe。。。

今次去旅行，已經冇上兩次咁緊張，要為皓皓張羅一切，因為就算帶漏嘢，嗰邊都有得買，加上皓皓既適應力完全冇問題，仲見佢都幾期待添，成日嗌住去日本搵包包超人，所以媽咪都冇點準備過；唯一係今次挑戰體能極限－－坐凌晨機，令媽咪有啲擔心，同埋今次join埋 bear bear契爺＆未來契媽一齊去，所以希望盡量搵啲地方係啱大家去既。。。。

好啦，唔講咁多，即刻帶埋大家黎我哋呢次東京吃喝玩樂之旅。。。。

七月五日（星期一）～～Day 1

羽田空港→築地→南青山→原宿→池袋酒店

我哋坐日航凌晨１點幾班機，皓皓本來响車上面瞓著咗，點知～～

最唔想發生既嘢發生咗～～就係去到機場皓皓就醒咗。

媽咪係擔心佢上到機唔會再瞓番，果然。。。。

佢响機場越跑越起勁，越跑越精神。。。

上到機爸爸氹咗佢好耐，到差啲瞓著既時候，

個空姐竟然好唔識趣咁走黎問我哋要唔要兒童餐，

皓皓又即刻彈起身，俾個空姐吹到'啤'一聲。

去到羽田至係當地時間六點幾，第一時間寄行李番酒店，

然後買京急線車飛去大門再轉車去我哋第一個目的地。。

攝於京急線列車內。。。

趁架車未開，較時間掣影一張大合照～～

黎到呢度，大家應該知我哋第一個目的地係邊豎喇＠＠

冇錯喇，就係築地市場。。。

排咗粒幾鐘，就係為咗大家都咁鍾意食既新鮮肥美sushi～～

壽司大～～爸爸媽咪既至愛。。。

本來諗住食完呢餐，會搵多一日黎翻啅。

點知最後冇時間黎多劑，真可惜～～

師傅俾咗碗壽司飯皓皓食，皓皓勁大聲講：好好味呀～～

攪到全場爆笑，跟住聽到有師傅同食客讚阿b kawaii呢，

阿b仲成日捉住店裏面個姨姨隻手同人玩，氹到人不知幾開心。

食完壽司大，再去第二間食咗碗海膽飯。。。

食完咁豐富既早餐，就去南青山同原宿shopping喇。

先行Original Fake～～

阿b喪跑～～

估唔到個男sale仲認得媽咪，臨走仲話下次再見，

媽咪就同佢講可能出年就再見，haha。。。

主打係買嘢，所以影相亦不多。

响prada門口見有幾個人影相，媽咪又影埋一份。

同爸爸禁完汽水機，你哋睇皓皓個樣幾神氣～～

就坐响街邊飲～～

行行吓街開始落大兩，攪到好狼狽。

阿b好似仲記得Milo入面呢個蕉池。。。。

行完milo，啲雨未停過，差唔多去到mercibeaucoup，仲落狗屎添，

攪到我哋啲紙袋濕晒，最後穿埋～～

而我哋一個二個又濕又攰，唯有番酒店放低晒啲嘢先。。

原本仲諗住落新宿，但係最終冇去喇，响池袋間康竜食。。

啲麵同湯底都好正，阿b都好鍾意食。。。

食完再去便利店買啲嘢食就番酒店瞓喇。

原本諗住坐凌晨機，驚阿b冇精神玩，所以至plan全日shopping，

但係估唔到最攰最冇精神既，原來係我哋幾個大人。