東京吃喝玩樂之旅～Day 2(part 1)＾＾情迷Sanrio Puroland

七月六日（星期二）～～

Day 2（part 1)

酒店→Sanrio Puroland→南大沢outlet→新宿→酒店

今日主要想同皓皓去Sanrio Puroland，亦即係我哋香人成日講既Hello Kitty Land。媽咪小學就開始鍾意hello kitty&Keroppi，自從同爸爸十多年前第一次去旅行黎過Hello Kitty Land後，都冇再黎過喇！不過咁，今日既行程絕對唔係為咗媽咪一己既私慾架，而係事實上，皓皓都幾冧Hello Kitty，hahaha．．．

早餐係去到新宿JR站至是旦搵間烏冬麵食。

皓皓稱之為神奇烏冬，點解咁叫？

媽咪搲爆頭都諗唔明

响京王多摩センター站出口直行，冇耐就見到個門口。

一入場就見到Kitty同Daniel喇，佢哋左右挾實皓皓影相，

難得皓皓又唔抗拒喎！

皓皓同Cinnamon握握手．．．．

見Sanrio Character Boat Ride無人排隊，就即刻衝去玩啦！

點知皓皓一上船，就嗌到拆天，猛話：

真係好驚！走啦！我要返屋企！

媽咪真係始料不及，見皓皓聲淚俱下，媽咪又心亂又心痛！

其實入面真係好靚，點解你會驚既，阿仔？？

坐完船仔黎到Kitty House，Kitty House門外最搶眼既睇怕都係呢架跑車。

男仔坐Kitty車都唔係好乸啫！幾型仔呃！

媽咪都忍唔住要影番幅相．．．．

入到Kitty House，基本上所有嘢都係Kitty黎既．．．．

皓皓對張梳化好有興趣～～

對呢缸會郁既假魚仲有興趣，扯都唔肯走。

不過要數最鍾意既，就非呢度莫屬喇．．．．

呢度有幾本書裝咗機關，會每隔一小段時間就自動彈出，

皓皓將一本書拍番埋，見另一本又彈出，興奮到癲咗．．．

連浴缸都係Kitty，

呢張梳化媽咪都鍾意呀！

响出口既位置，Kitty會企咗响度等同你合照．．．

差唔多十二點，去餐廳沖支奶俾皓皓飲，曳豬皓皓係要除咗隻鞋擺上枱。

佢話隻鞋有'骨'（即係有嘢'銀'住，唔舒服），

實情係佢隻腳跟尋日响原宿俾蚊叮咗一啖，有少少腫咗，

所以著咗隻鞋就好似有嘢'銀'住咁囉！

見到佢面容扭曲咁講：'真係有骨！'媽咪真係好想笑囉！

上次响大阪玩過呢隻抽獎，今次一見到就自己要求要玩。

雖然多數都係抽到唔等駛既嘢，不過見皓皓咁開心，就俾佢抽兩次啦！

响體驗工場呢度有隻好大好靚既Kitty．．．．

呢日最開心就係有得畫人像畫，三個一齊畫都係4000yen，ok喎！

阿鬍鬚叔叔真係好認真好認真咁畫，媽咪心裏面盤算：

點都唔會差得過响海洋公園畫嗰幅卦．．．

皓皓耐性有限，鬍鬚叔叔畫完佢嗰part同媽咪嗰part，佢係要跣落地逃跑。

要媽咪扭朱古力豆．．．

見啲朱古力'沙沙'聲咁跌落黎，興奮到佢咩．．．

完成作～～大家話似唔似呢？

媽咪同爸爸都好鍾意呢幅畫，因為畫得皓皓好得意！

皓皓好攪笑，走去吹後面背景啲蠟燭．．．

媽咪一定要為皓皓呢個動作解吓畫～～

佢舉高隻手自己吱自己隔啦底，仲要自己講：吱隔啦底！

真係笑屎媽咪！

最後行吓啲商鋪，不過媽咪計一計，原來啲嘢仲貴過响香港買。

所以我哋只係買咗少少零食、文具、兩條短打、一個背囊就走喇！

(不過話時話，唔知點解呢度竟然有Milo買，結果我哋買咗個大背囊)

至於皓皓手上呢副玩具，媽咪最後被迫買咗俾皓皓，原因係～～

呢隻衰豬仔竟然用迅雷不及掩耳既手法搣爛咗人哋副玩具，

激屎媽咪喇，成舊水，竟然得個包裝盒上有kitty個樣

 

行完啲shop，我哋就離開去第二個目的地喇，

下part再見！