4月12日同13日，爸爸冇假放，不過媽咪都有帶我出街街．．．．12號，媽咪同我去公公婆婆度。13號，我哋陪心心表姐去冒險樂園玩，心心表姐超開心，因為有得玩佢至愛既波波池，而我就．．．．
冇得玩波波池，唯有坐車車。
不過架車車都幾好玩，除咗扭軚，仲可以拉棍波！
麵包超人？
媽咪，架車車同我哋屋企附近商場入面嗰架一樣架喎！
咦！又有軚盤？
又渣番一轉車先！
玩完冒險樂園，我哋就番咗屋企喇！由媽咪9號放假開始，我哋日日都去街街，所以媽咪話呢日要早啲番歸攤呌吓．．．．
話就話早啲，但係番到屋企都已經係黃昏喇！
近呢幾個月，我愛上咗企响窗口旁邊睇景，睇車車啦、船船啦、海海啦、樹樹啦，仲耐唔耐睇到雀雀添！
呢排仲愛上咗玩脷．．．．
伸少少．．．．
再伸長少少．．．．
連笑緊都要伸脷，真係醜醜！
4月14日係媽咪last一日復活節假，呢日爸爸都攞咗假，佢哋撇甩咗我，兩個人自己出咗去玩！不過算啦，媽咪放6日假，都陪我玩咗5日喇．．．．
4月15日，媽咪要番工 lu！媽咪好似好唔捨得我咁，朝頭早陪我玩完一輪至番工．．．．
之前我淨係識得成隻手仔拍落啲掣度，而家識得用一隻手指逐粒逐粒掣咁彈喇！
係爸爸教識我既！你哋睇吓我個樣幾得戚！
彈彈吓又會將隻龜仔翻轉，玩嗰4個車轆！
我又鍾意將媽咪已經執好晒既袋亂摷一通，實摷到野玩架！
嗱！呢日我就摷到潤唇膏喇！唔．．．好香既士多啤梨味！
吓！媽咪，你夠鍾番工嗱？我都好唔捨得你喎！
唉！阿b，媽咪每次番工一拴門就聽到你啲喊聲，搞到我成日都有衝動'曠工'番轉頭陪你呀！
下面兩幅相係尋日同前日影既，大家有冇留意到有啲嘜野異樣？
唉，真係冇陰公呀！15號朝早阿b塊面仲係青靚白淨，點知夜晚就俾隻衰鬼蚊响隻手度咬咗3粒，塊面度又咬咗3粒！响張相度你哋見到2粒，其實有粒响塊面既側邊，所以正面睇唔到！
查實嗰晚媽咪已經幫阿b頂咗十幾粒架喇(絕對冇誇大，但係好奇怪地爸爸一粒都冇！)，點知阿b都係逃唔離隻衰蚊既'魔口'，點解你隻衰蚊唔咬晒媽咪我就算呢？
沒有留言:
張貼留言