珍貴片段

０９年４月３日

阿b，今朝返工之前諗起好似幾日冇同你影相，於是攞起相機幫你影咗幾張．．．．

　

媽咪認為，每個人細個嗰陣唔多唔少總會有啲值得緬懷、珍惜既片段同回憶，但係隨住年齡既增長，呢啲回憶同片段會逐漸俾人遺忘。就好似媽咪咁，自問由細到大既記性都唔差，但係對於小三之前既生活片段，印象模糊不堪；除咗記得幼稚園嗰條又長又黑既樓梯、幼稚園間黑房、幼時屋企狹窄既居住環境，同埋成日俾你公公打之外，其餘幾乎係零記憶。

有時見到人哋攞番細個bb時候既相出黎俾人睇，媽咪都幾羡慕，因為媽咪細個屋企好窮，你公公婆婆要為生活奔波，又邊有閒情逸致幫仔女影生活照呃！所以媽咪連1張bb相都冇！媽咪唔會埋怨－－環境迫人嘛！邊個父母唔想自己仔女豐衣足食呃？但係唔能夠否認呢樣真係一個遺憾黎－－媽咪真係好想知道自己bb時候個樣呀！

對於一啲兒時既片段或者趣事，媽咪只能靠你婆婆口述而得知，但係你媽咪我有七個兄弟姐妹，婆婆又邊記得咁多呃！所以媽咪真係好想，將你由出世以後既生活片段透過相片同文字記錄落黎，等你大個仔之後，成日可以攞番出黎回味吓；亦都等媽咪記憶逐漸衰弱既時候，可以重溫一吓我哋既快樂片段。

　

1歲既阿b，你最近做咗幾件令媽咪好開心既事，媽咪真係怕自己有一日會唔記得，真係好想將佢記錄低．．．．

3月28日，媽咪幫你搞咗個生日party，搞之前係預咗麻煩架喇，不過冇諗過咁辛苦，因為你差唔多全程要媽咪抱，唔肯跟人、唔肯玩、唔肯影相、連你最鍾意既食野都唔肯，爸爸咁啱公司又有野做，來去匆匆，連一張全家福都冇影過．．．番到屋企，爸爸都係未做完野，媽咪同你換衫、抹面抹手、餵奶，然後氹你瞓，你好似知道媽咪唔開心咁，差唔多瞓著既時候，你突然將額頭貼住媽咪額頭，兩隻手仔捧住媽咪既面，然後嗌：媽媽媽媽媽媽，跟住就甜甜咁瞓著咗．．．．阿b雖然你未夠九個月就識叫媽媽，但係就從來未試過响臨瞓前咁溫柔咁嗌媽媽，真係好sweet sweet 呀！

第二日，又發生咗另外一件事．．．．話說曳曳既你專登將媽咪部手提dup咗落床既罅隙度，激到我紥紥跳，因為真係好難攞番出黎，正當媽咪一面好努力咁嘗試執番部電話，一面好勞氣咁唸唸有詞既時候，阿b你突然好浮誇咁乾笑－－嘿嘿嘿嘿嘿嘿．．．．總共有五、六次之多，好明顯係阿b你知道激親媽咪，特登咁樣笑諗住氹番我，咁你當然成功咗啦！跟住媽咪連電話都唔執住，攬住阿b你係咁笑．．．．

上星期，媽咪放假，我哋兩母子又例牌一齊响張床度玩吓玩具，睇吓街上面啲車車，攤响張床度傾吓計（當然係媽咪講大人話，你就講bb話－－咿咿哦哦，不過真係你一句我一句，好似傾緊計咁），媽咪無聊之際，就攞起爸爸條攬枕，對住攬枕上面既米奇講：「米奇老鼠乖乖，媽咪錫晒，呵－－」响呢個時候，我意想不到既野發生喇－－阿b你乍乍林趷起身，爬過黎媽咪度，一手推開隻米奇老鼠攬枕，跟住個嘴仔就錫落媽咪度，足足成七、八秒．．．．攪到媽咪開心咗成日！可惜，自從我响你面前同爸爸講完呢件事之後，你好似知道我哋笑你咁，就冇再做呢樣野喇！

　

阿b，呢個月媽咪真係覺得你大個咗好多，識多咗好多野，唔知你幾時又會俾到啲驚喜媽咪呢？