我最喜愛老師選舉

皓皓而家上緊第三個既親子遊戲班，大大話話認識咗６位老師。有一晚我哋母子臨瞓前傾計，媽咪問：皓皓最鍾意邊個老師？譚老師？張老師？鄺老師．．．皓皓答：熊老師！然後又講：I love熊老師！

媽咪搲爆頭，諗極都唔明點解皓皓會鍾意熊老師，媽咪問佢呢條問題當日，佢只係見過熊老師一次。。。。直至上星期六上第三個親子遊戲班既第二堂，媽咪終於搵出真相。。。。

四月十日（星期六）

响親子遊戲班咁多個活動當中，皓皓既最'飛佛'～～

'筆'豆豆！

皓皓玩到極度投入～～

記得上一堂係皓皓第一次玩'筆'豆豆，佢玩到唔肯入課室。

到老師要清場冚埋個蓋既時候，佢喊到好淒涼！

媽咪終於醒起皓皓鍾意熊老師既原因喇～～

話說上次皓皓玩體能活動既時候俾個哥哥撞親，

嗲爆既皓皓即時喊到收唔到聲。。。

熊老師埋黎氹番佢：老師俾皓皓玩'筆'豆豆好唔好？

然後拖佢過去打開個蓋俾佢玩。

皓皓第一次玩就瘋狂地愛上呢個小玩意，

所以我估熊老師响皓皓眼中係一個天使黎架！

玩遊戲既時候影既。。。。

不嬲上呢啲遊戲班都話唔俾影相，所以上第一堂既時候媽咪都冇影。

點知見有個家長全程肆無忌憚咁影都冇俾人話，

咁今次第二堂媽咪都影囉！

跟住音樂打拍子。。。。

臨落堂响課室等攞禮物＆今堂做既小手工～～

呢～～我手上渣住既就係今堂既禮物＆小手工。

禮物係孖寶蛋糕一個。。。。

小手工係嘜呢？？

就係呢個用泥膠整既提子喇！

睇住孖寶蛋糕'sir'滑梯，皓皓覺得新鮮又好玩，笑到卡卡聲！

呀！第一堂既禮物同小手工既相唔記得放上黎～～

係一個毛巾蛋糕同埋生果籃。

皓皓以為個毛巾蛋糕食得既，即刻要求拆開。。

臨走又例牌坐呢架車～～

上完堂番屋企瞓個覺，瞓醒就出太子陪爸爸睇魚魚，點知只係出去打個白鴿轉，竟然又破財。。。。

就係呢個包包超人微波爐～～

HAHA。。。好玩！

整到好似真既一樣：又著燈，又識轉，時間夠仲會'叮'一聲。。。

咁鬼得意，真係過份！攪到又忍唔住手。

仲買咗粒好可愛既包包超人骰骰。。。

心心表姐，我同你鬥擲得大點數咩！

紥馬。。。。拋！

嘩哈哈！我嬴咗！！

除咗玩具，又買咗對涼鞋仔～～

好輕便，平時落公園著啱晒。